Qendra e Tiranës ka qenë më e lehtësuar sot, pas hapjes së segmentit të fundit të Unazës së Vogël. Ndonëse lëvizja gjatë ditës së sotme në rrugët kryesore ka qenë më e reduktuar se ditët e tjera të javës, trafiku tanimë i ka hapur rrugë një qarkullimi të normalizuar. Kryetari i bashkisë, Erjon Veliaj ianguroi këtë investim që nis nga Ushtari i Panjohur deri te Banka e Shqipërisë dhe tha ky projekt është tregues i asaj ç’ka mund të jetë Shqipëria nëse punohet dhe bashkëpunohet.
“Ky ka qenë një projekt për të cilin flitej prej 25 vitesh, me shpronësime, me ndërtesa që duheshin prishur, me pengesa burokratike, stërkëmbësha politikë, llafe e llogje. Por, ky projekt mund të jetë edhe një metaforë e asaj ç’ka mund të bëhet Shqipëria, nëse punohet dhe bashkëpunohet. Nëse fokusohemi te puna, atë që kemi bërë këtë vit në Tiranë, mund ta bëjmë kudo. Në qoftë se bashkia lejohet të punojë, e nëse nuk harxhojmë kohë me debate bosh apo duke i vënë stërkëmbësha njëri-tjetrit, puna ecën jashtëzakonisht mirë”, tha Veliaj.
Veliaj theksoi se ky projekt nuk mbaron këtu, pasi do të vijojë puna me intensitet edhe për projektin e sheshit “Skënderbej”, ndërsa kërkoi mirëkuptimin e qytetarëve për vështirësitë e krijuara në një qytet si Tirana, që është gjithmonë në zhvillim.
Për ndërtimin e Unazës së Vogël u bë e mundur shembja dhe shpronësimi i pronarëve që prekeshin nga ndërtimi i këtij segmenti, si dhe u zhvendos nënstacioni elektrik që ishte kthyer në një problem prej vitesh edhe për banorët që jetonin aty pranë. Gjithashtu, përveç ndërtimit të segmentit dhe të kanalizimeve, u zhvillua infrastruktura nëntokësore dhe mbitokësore. Sakaq, OSHEE nga ana e saj bëri të mundur përfundimin e zhvendosjes dhe lidhjes së fidrave në Nënstacionin elektrik në qendër më shpejt se sa ishte parashikuar në kontratë, data 15 dhjetor, duke e mbyllur të gjithë proçesin në datë 26 nëntor./tesheshi.com/
