Kreu demokrat Basha mohoi që ai të ketë qenë pjesë e ekipit të ndërkombëtareve të pasluftës në Kosovë, i cili ka hetuar krime të pretenduara të UÇ-së. Siç tha ai në Real Story të Sokol Ballës, ai ka qenë pjesë e hetimeve për të kundërtën, krimet serbe.
“Kurrë s’kam qenë pjesëtar i ndonjë procesi hetimi ndaj UÇK. Isha pjesë e skuadrës së Tribunalit të Hagës për hetimin e Millosheviçit dhe jam krenar për këtë.
Skuadrat ishin të ndara. Skuadra që hetonte krimet e serbëve s’mund të hetonte dhe shqiptarët.
Për rolin tim në UNMIk ka konsistuar në 3 detyra për 6 muaj: në hetimin e krimeve të serbëve, në spastrimin etnik të Mitrovicës së Veriut. Jemi rrethuar në Gjykatë nga Rojet e Urës, paramilitarë serbë. Kam punuar për 1 vite, si person përgjegjës në një nga pesë zonat nën KFOR. Dhe e fundit, përgatitja e tranzicionit të pushtetit, nga OKB tek autoritetet e Kosovës…”, ishte arsyetimi i Bashës për pretendimet ndaj tij se ka qenë protagonist në hetimin e krimeve të pretenduara shqiptare gjatë luftës.
Më herët, TCH solli dëshminë e një prej të mbeturve gjallë nga masakra e Krushës së Madhe, ndër më mizoret në Kosovë, i cili tha se i kishte dhënë Bashës pas lufte një kasetë të xhiruar prej tij me një pjesë të masakrës, pasi i ishte kërkuar pikërisht nga Basha, me idenë për ta çuar në BBC.
Por sipas Milaim Bellanicës, njeriut që e thotë këtë, ajo kasetë u zhduk, ndërsa Basha nuk pranoi ta takonte kohë më vonë.
Edhe për këtë rast, Basha tha se nuk ishte e vërtetë dhe se nuk e njihte personin në fjalë. /tesheshi.com/
