Aktualisht ekziston një “shpërthim” i numrit të të infektuara me COVID në Evropë, tha të enjten drejtori i degës Evropiane të Organizatës Botërore të Shëndetësisë (OBSH) Hans Kluge, duke bërë thirrje që shkolla të mbyllen si një mundësi e fundit.
“Ne jemi dëshmitarë të një ‘shpërthimi’ të numrit të njerëzve të infektuar në Evropë, ku për vetëm disa ditë ky numër është rritur me një milion tjetër, dhe gjithashtu shohim që vdekshmëria gradualisht po rritet,” theksoi ai për AFP.
“Ne nuk mund të relaksohemi. Do të jetë një periudhë pak e vështirë, duhet ta pranojmë,” tha Kluge.
Zona Evropiane e OBSH-së, e cila përfshin 53 vende, përfshirë Rusinë, ka raportuar më shumë se 11.8 milion raste dhe gati 295,000 vdekje që nga shpërthimi i pandemisë, sipas organizatës.
Në shtatë ditët e fundit, janë raportuar pothuajse 1.8 milion infeksione të reja dhe 19,500 vdekje.
Sipas OBSH, “duke veshur maska në mënyrë universale dhe duke kontrolluar rreptësisht tubimet deri në shkurt në Evropë, ne mund të shpëtojmë më shumë se 261,000 jetë”.
“Status quo-ja nuk është një opsion dhe kjo organizatë po u bën thirrje vendeve të zbatojnë masa të synuara dhe proporcionale për të ndaluar rritjen e numrit të infektuarve dhe vdekshmërisë,” shtoi Kluge.
Por shkollat duhet të qëndrojnë të hapura “deri në fund” dhe të mbyllen vetëm si një mundësi e fundit, tha ai.
“Nuk ka asnjë arsye për të pohuar se shkollat janë bartësit kryesorë të infeksionit,” tha ai.
“Shkollat duhet të qëndrojnë të hapura deri në fund, sepse nuk mund të lejojmë që i gjithë brezi të humbasë për shkak të COVID-19”, tha Kluge. /tesheshi.com/
