Gjithçka ka ngjarë për disa muaj ngjan të ketë qenë më shumë një betejë politike për matje forcash, pasi në fund Komiteti Olimpik Ndërkombëtar e ka lejuar më tepër se dy të tretën e atletëve rusë që të marrin pjesë në Lojërat Olimpike të Rio de Zhanejros.
Një rishikim përfundimtar nga një bord ekzekutiv me tre anëtarë ka ndezur dritën jeshile për pjesëmarrjen e 271 sportistëve rusë në garat e Lojërave të Rios.
Në më pak se 24 orë para nisjes së ceremonisë hapëse të lojërave, Komiteti Olimpik Ndërkombëtar lajmëroi në faqen e saj zyrtare elektronike se, “271 atletë do ta përbëjnë ekipin e paraqitur nga Komiteti Olimpik Kombëtar Rus prej listës së parë të hyrjes prej 389 atletësh.”
Komiteti Olimpik Ndërkombëtar u ka dhënë lejen për pjesëmarrje vetëm atyre atletëve që i plotësojnë kriteret e prera të vendosura më 24 korrik.
“Dëshiroj të lajmëroj se shumica e ekipeve tona do të marrin pjesë plotësisht në Lojërat Olimpike,” u tha gazetarëve një ditë më parë Aleksandr Zhukov, kryetari i Komitetit Olimpik Rus.
Në pikëpamjen e tij, Rusia do të ketë ekipin më të pastër të Lojërave Olimpike.
“Ekipi rus mund të ketë provuar kontrollet më të ashpra të Lojërave Olimpike, sepse ka kaluar teste dhe kontrolle të shumta. Veç kësaj, atletët rusë do të kalojnë teste shtesë në fshatin olimpik. Kështu që ekipi rus është mbase më i pastëri në Rio.”
Dyshimi për një përdorim masiv nga atletët rusë të substancave të ndaluara e pati vënë në qendër të vëmendjes çështjen e pjesëmarrjes së tyre në Lojërat Olimpike, aq sa u pretendua për një ndalim të plotë të vajtjes në Brazil. /tesheshi.com/
