Shkrimtari e publicisti, Veton Surroi, me rastin e 26 vjetorit të sulmit të parë të pushtetit serb mbi familjen Jashari, ka kujtuar këtë ditë. Bashkë me Fehmi Aganin, Bajram Kelmendin e Zenun Çelajn ishin nisur për Prekaz, siç thotë, për t’i bërë me dije policëve se po shkelnin të drejta të njeriut.
26 vjet pas, Surroi thotë se “kushdo ka mundur të mësojë prej asaj dite, kushdo mund të nxjerrë mësimet që do sot”.
Postimi i Plotë
Sot, para 26 vjetësh që sulmi i parë ndaj familjes Jashari, nga e cila kishte krisë pushka kundër policisë serbe. Në Prekazin e rrethuar u nisëm dr. Fehmi Aganin, Bajram Kelmendin, Zenun Çelajn dhe unë. Aty u takuam pastaj edhe me dr. Zekirija Canen. Në pasdite policia kishte nxjerrë meshkujt e fshatit, pa i lënë të visheshin për të ftohtit jashtë. Një autoblindë e drejtonte automatikun e rëndë drejt fshatarëve, një oficer policie me automatik kërkonte që ne të largoheshim. Mbi Prekaz fluturonte një helikopter i policisë.
Mbetëm aty deri në mbrëmje, me tërë pafuqinë tonë, por të vendosur për të treguar se në atë moment, që të gjithë ishim të njëjtë, edhe fshatarët e paemer të Prekazit që prisnin ndëshkimin e hakmarrjes së policisë, edhe ne që kishim emër publik dhe që kishim ardhur për t’u thënë policëve se po shkelnin të drejta të njeriut. Se një ditë dikush do t’ua përkujtonte.
Kushdo ka mundur të mësojë prej asaj dite, kushdo mund të nxjerrë mësimet që do sot.
Njëri prej mësimeve për të gjithë, të paemra e figura publike është se prej asaj dite ka kaluar shumë mund, gjak e vaj që të jemi në liri, ka kaluar shumë mund, gjak e vaj që të mos lejojmë të kthehemi në kohë pasigurie.
