Nga Ylli Pata
Janë hapur të gjitha kartat politike në 25-vjetorin e Partisë Socialiste.
Edi Rama tashmë nuk e ka aleat Ilir Metën dhe qeveris me inerci.
Vetë Ilir Meta kishte sajuar një vizitë zyrtare në Mal të Zi, të cilën me të gjitha gjasat mund ta zhvendoste ose para ose pas kremtimit të mbushjes çerekshekulli të partisë ku nisi politikën, por edhe forcës me të cilën ndodhet në koalicion.
Ndërkaq, në oborrin e prapmë të PS-së, mungojnë ministrat e LSI-së, edhe pse zyrat e tyre i kanë vetëm 10 metra më larg. Madje zyra e Panaritit dukej me dritë dhe ministri i Bujqësisë sa ishte kthyer nga vizita në SHBA.
Dikush thoshte se do të vijë Petrit Vasili dhe Lefter Koka.
Kaloi një orë dhe më shumë, por askush nuk dukej.
Por ja, duke ecur ngadalë së bashku me Dr.Sabit Brokajn, ja beh “baba Taku”, njeriu i unitetit PS-LSI, i cili ishte pjesë e listave të PS-së më 2013, duke qenë nga ana tjetër anëtar kryesie i LSI-së.
Pra, Spartak Braho ishte i vetmi aleat prezent në festën e PS-së, përjashtuar Zef Bushatit.
Koço Kokëdhima ishte mjaft i tendosur. Edi Rama që rrinte shumë me të shoqen Lindën, ndalonte grup më grup, i shkoi afër ish-deputeti të Vlorës, por nuk e takoi, po fare.
Me Koçon rrinte Majko, por që kokën e mbante vetëm prapa dhe ishte tërë nerva.
Ervin Bushati, deputeti socialist po argëtohej: “Hë ç’thotë filantropi”, pyet me shaka ish-kryeministrin.
Fatos Nano nuk kishte ardhur, por jo vetëm ai. Tashmë në Partinë Socialiste padron është Edi Rama dhe njerëzit e tij. Prej kohësh është mbyllur epoka e vjetër e PS-së.
Vetë Edi Rama u përgjigjet atyre që e kritikojnë me menefregizmin e tij.
“Nga njëra anë, njerëzit më shohin në një tribunë në ndeshjet e futbollit europian, në konferencë apo hyrjet e daljet e kësaj godine dhe mund të mendojnë se, a mendon ky njeri për hallet tona?! Unë nuk i vë faji askujt që mendon kështu. Ashtu siç nuk i vë faji askujt që mendon se s’kam bërë gjë për komunitetin, ku ai jeton, apo që, për fajin tim nuk punon aty ku dëshiron apo që ka një hall tjetër. Por ta dini se unë nuk harroj se sa shumë kemi ende për të bërë dhe për kë punoj, se kujt i shërbej. Unë asnjëherë nuk harroj se cili është objektivi dhe aspirata e të gjithëve ne… Këtu mësova se, politika sa më lartë rritesh aq më me vështirësi rrjedh uji…Nuk mund t’i kënaqësh të gjithë, gjatë gjithë kohës, pastaj ka njerëz që s’mund t’i kënaqësh kurrë…”, tha Rama.
Megjithatë, brenda PS-së ishin të gëzuar që festonin vetë.
Raufi, një socialist shkodran, kur pyetet se “si të duket që mungon LSI-ja?” përgjigjet me një frymë: “Ma mirë morr ta marrsha. Jena qetë në shtëpinë tonë. Ata s’na thërrasin kur bëjnë allishverishet, kanë marrë vendet e punës më të mira, kurse ne jemi pa punë ende. Më mirë në opozitë, por jo kështu hem në pushtet, hem pa punë…/tesheshi.com/
