Kreu i Partisë Demokratike, Lulzim Basha, ka qenë i pranishëm ditën e sotme në 25-vjetorin e krijimit të Bashkimit të Sindikatave të Pavarura Shqiptare. Gjatë fjalës së tij, kreu i demokratëve u shpreh se BSPSH është e gjallë dhe e fortë, ndërsa Edi Rama dhe ajo që Basha e cilësoi si oligarkia qeverisëse, e do të vdekur.
Në nisje të fjalës së tij, numri një i PD-së deklaroi se themelimi i BSPSH qëndron me dinjitet të madh në piedestalin e shumë ngjarjeve themelore në përmbysjen e diktaturës dhe nisjes së Shqipërisë së hapur. Sipas Bashës, sindikatat zbritën në arenën e kohës si një fuqi e re e përshpejtimit të ndryshimeve demokratike në vend.
“Flasim për shumë nisma dhe kauza vendimtare që përmes forcës së bashkimit, organizimit, historia jonë nuk i kishte njohur më parë. BSPSH hapi rrugën e lirisë dhe demokracisë në Shqipëri 25 vite më parë. Edhe PD edhe sindikatat e pavarura i ka lindur liria”, – tha Basha.
Ai deklaroi se PD dhe Bashkimi i Sindikatave të Pavarura Shqiptare kanë vlera të përbashkëta që janë të shenjta për ta, siç janë puna, dinjiteti i punëtorit, i qenies njerëzore, i shqiptarit.
“Ju jeni demokrat kur luftoni dhe predikoni për këto vlera. Ne jemi sindikalistë kur luftojmë dhe punojmë për këto vlera. BSPSH punon për të mbajtur qeveritë e çdo ngjyre politike nën presionin e fortë të kërkesave për zbatimin e ligjeve që mbrojnë punëmarrësin”, – ishin fjalët e Bashës.
Ai foli për situatën në vend duke u shprehur se vihet re ulje e rrogave dhe varfëri në rritje, ndërsa shtoi se “BSPSH është e gjallë dhe e fortë edhe pse oligarkia në fuqi e do të vdekur. Nuk janë taksat, nuk është klima e biznesit, por ne paskemi një avantazh tjetër sipas Ramës, ose më saktë nuk kemi diçka që duhet të na bëjë punë: Nuk kemi sindikata – kjo është batuta e Ramës para investitorëve italianë, – deklaroi kryedemokrati.
Për Bashën, Rama dhe kupola që qeveris sot vendin nuk kanë lidhje me të majtën, të djathtën apo qendrën, por vetëm me interesat e tyre të ngushta dhe urrejnë institucionet e pavarura, sindikatat e pavarura, gjithçka që nuk e kanë nën presionin e tyre. /tesheshi.com/
