Partia Demokratike ka organizuar një aktivitet përkujtimor për rrëzimin e bustit të ish-diktatorit Enver Hoxha. Në fjalën e tij, kreu i PD-së, Lulzim Basha ka akuzuar qeverinë se po hesht për këtë ngjarje të rëndësishme.
Sipas tij, rrëzimi i shtatores së diktatorit Enver Hoxha, është ngjarja që foli më shumë se çdo gjë tjetër për gjysmë shekulli për vendin tonë, pasi shënoi rrëzimin e modelit të së keqes. “Heshtje që flet shumë për raportin me trashëgiminë hoxhiste, nuk u bën zemra, nuk lartësojnë trimërinë e shqiptarëve, ata duan popull që trembet e struket. Ata promovojnë nënshtrimin, investojnë shuma për trushpëlarje që të fshehin dështimet dhe abuzimet e tyre”, deklaroi Basha.
Ai shtoi se demokracia është e papajtueshme, alergjike dhe e pashartueshme me çdo element të diktaturës dhe me simbolet e saj dhe se ky është mësim i vyer që udhëton në kohë nga një brez në tjetrin.
“Në këtë 25 vjetor, 20 shkurti ndan sërish dy modele, dy botë, dy rrugë për të ardhmen e vendit, ne që shikojmë e mësojmë nga modeli i demokracive perëndimore dhe kundërshtarët tanë kanë në mendje adhurimin për modelin e diktatorit”, u shpreh Basha. /tesheshi.com/
