Një zjarr i rënë këtë të enjte në një spital në Xhazan, në jugperëndim të Arabisë Saudite, ka qenë fatal për më së paku 25 persona, që kanë humbur jetën, ndërsa 107 është numri i të lënduarve.
Siç njofton Drejtoria e Mbrojtjes Civile Saudite, flakët e zjarrit në spital u panë fillimisht në mesnatën e ditës së sotme, diku rreth orës 02:30. Zjarri mendohet të ketë nisur në katin e parë të spitalit, ku gjenden salla e lindjeve dhe salla e reanimacionit.
21 ekipe të mbrojtjes civile ndihmuan në shuarjen e zjarrit, e po hetohet për shkaqet e rënies së tij. Të plagosurit janë mbartur në spitalet e tjera të zonës për trajtim të mëtejshëm.
Incidenti i sotëm vdekjeprurës në vendin arab pason atë të gushtit të këtij viti, kur 10 persona vdiqën dhe 259 të tjerë u plagosën pas rënies së zjarrit në një kompleks banimi. /tesheshi.com/
