Kur erdhi për herë të parë nga Turqia në Kanada para një dekade, Olcay Seki nisi të mësohet të agjërojë muajin e Ramazanit vetëm me familjen e tij.
“Është traditë që gjatë muajit të Ramazanit, familjet myslimane të presin njerëz apo familje tjera”,- thotë Seki gjatë një interviste për emisionin Metro Morning të CBC. “Por unë në fakt kurrë nuk ndieja nevojën që të ftoj dikë pasi agjëroja.”
Projekti i quajtur “Njihuni me fqinjin tuaj”, është duke synuar që të ndryshojë këtë, duke inkurajuar familjet myslimane të mirëpresin fqinjët e tyre jomyslimanë në tryezat e tyre për iftar, me qëllim që së bashku të prishin agjërimin dhe të mësojnë më tepër për muajin e Ramazanit.
Muaji i shenjtë i Ramazanit karakterizohet me falje të namazit, agjërim, lëmoshë dhe vetë-llogaritje nga lindja e diellit deri në perëndimin e tij. Në fund të ditës, agjërimi prishet me shujtën ditore që njihet me emrin iftar.
Seki është përfshirë në këtë projekt para 4 viteve dhe thotë se ka ndryshuar qasjen e tij, në lidhje me atë se si ka mundësi që kjo përvojë e Ramazanit të ndahet me të tjerët.
“Kam menduar se në Turqi Ramazani është vetëm për myslimanët, por pastaj kuptova se sa më shumë kohë po kaloja me mysafirë të ndryshëm në shtëpinë time, Ramazani në një formë është shumë kanadez, është shumë universal”, thotë Seki.
Familja e tij tashmë pret më shumë se 15 mysafirë në shtëpinë e tij gjatë muajit të shenjtë të Ramazanit, duke i gostitur ata për iftar.
Të premten, ata përgatitën iftar për mysafirët me një meny të pasur, që është vështirë të rezistohet, përfshirë:
- Supë thjerrëz
- Sallatë e përzier pranvere
- Sallatë karote me salcë kosi
- Byrek
- Oriz
- Karnıyarık (patëllxhan të mbushur me mish të bluar dhe perime)
- Pite të Ramazanit të bërë në shtëpi
- Kafe turke e shërbyer me bakllava me arra
Për Lily Leung, e cila është katolike, shefe për pasta me profesion dhe jeton në Toronto, të qenurit mysafir në familjen e Sekit për muajin e Ramazanit ishte një rast i mirë për t’u njohur me një kulturë dhe fe tjetër.
“Unë jam gjithmonë shumë e interesuar për gjitha fetë e botës,” thotë Leung. “Mu ka dukur shumë interesante ftesa për të qenë mysafir në shtëpinë e tyre për darkë. Kam mësuar më shumë për ushqimin dhe përmes ushqimit kam njohuri më të mëdha për kulturën e tyre”.
Seki thotë se në fillim, kur ndan tryezën me dikë të huaj është paksa e çuditshme, por në fund del se gjithmonë ia vlen.
“Jo vetëm që mysafirët mësojnë për kulturën dhe si agjërojmë ne gjatë muajit Ramazan, por në anën tjetër edhe unë mësoj shumë prej tyre gjithashtu“, thotë Seki.
“Është një përvojë shumë e mirë, edhe pse fillimisht nuk i njeh njerëzit të cilët i pret për mysafirë”, thotë ai, duke shtuar se fëmijët zakonisht janë të parët ata të cilët e thyejnë akullin.
Projekti “Njihu me fqinjët” ka për qëllim “të ndërtojë ura në mes të komuniteteve dhe të ndihmojë njerëzit të ndajnë përvojat e tyre me kulturat tjera“, sipas web-faqes së tyre. /tesheshi.com/
