Për herë të parë lideri historik i Partisë Demokratike Sali Berisha ka munguar në ceremoninë e organizuar nga Grupimi Dhjetor 90 me rastin e 24 vjetorit të rrëzimit të bustit të Enver Hoxhes. Por gjithashtu në ceremoni kanë mungur edhe shumë nga protagonistët e lëvizjes së nisur 25 vite më parë dhe që shënoi rrëzimin e komunizmit në Shqipëri.
Megjithëse në drejtim të Berishës ka pasur një ftesë nga organizatorët, ish-Kryeministri duket se ka bojkotuar ceremoninë. Ndoshta shkaku lidhet me faktin se ai nuk mund të ishte preznt në një ceremoni ku nuk ishte parashikuar të fliste, pasi vendin e tij e ka zënë Lulzim Basha.
Ky i fundit, në prani të disa dhjetra qytetarëve, nuk ka nguruar të akuzojë qeverinë Rama- Meta se është mishërim i pushtetit enverist. Partia Demokratike ka festuar sot 24-vjetorin e rrëzimit të bustit të Enver Hoxhës.
Kreu i PD Lulzim Basha në fjalën e tij tha se tashmë po jetojmë në një kohë kur ata që na qeverisin janë glorifikim i pushtetit të Hoxhës.
Sipas Bashës e gjithë kjo tregon nostalgjinë që kjo qeveri ka për diktatorin dhe politikën e tij. “Hoxhizmi dhe diktatura nuk duhet të kthehen më, ne nuk duhet të lejojmë që të tilla politika të rikthehen sërish,” – kështu u shpreh kreu i PD Lulzim Basha.
Sipas tij me anë të politikës së mazhorancës rrezikohet gjithçka, çdo pasuri publike dhe e mirë që vendi ka arritur deri më tani. “Nëse nuk i vemi kufi të keqes, ajo rrezikon që të përsëritet,” – tha Basha.
