Në një mbledhje të komisionit të ligjeve, ku si temë kanë qenë festat kombëtare, u propozua për herë të parë që 21 janari të jetë një festë e tillë. Eshtë fjala për ditën kur nisi punimet Kongresi i Lushnjës më 1920 e jo atë kur u vranë katër protestues në anë të kryeministrisë në 2011.
Ka qenë deputeti lushnjar Muslim Murrizi ai që e përcolli këtë propozim, duke thënë se është ndoshta dhe më madhore si datë se 28 nëntori.
Në stilin e tij gjuhëçapraz, Murrizi u shpreh:
“Ju mund të quani ditë festash edhe Halloween-in, ju keni vënë dita festash për domaten, djathin, makaronat, salcën e kosit dhe keni harruar Kongresin e Lushnjes. Bëhet fjalë për një gjë madhore, është më e rëndësishme sesa 28 nëntori vetë”, tha Murrizi.
Kujtojmë se Kongresi i Lushnjës hodhi bazat e shtetit shqiptar, ndryshe nga shpallja e pavarësisë. Si pikë kulmore, ky Kongres pati shpalljen e Tiranës si kryeqytet. /tesheshi.com/
