Nga Blendi Gashi
Delegacioni i Kosovës i cili po merr pjesë në punimet e Asamblesë së Përgjithshme të OKB-së, ka bërë bujë të madhe, sigurisht jo për ndonjë punë që do lë gjurmë, shembull, shtimin e njohjeve të reja që mungojnë prej kohësh, por fjala është për huqjet diplomatike që janë bërë dhe ngarendja nga presidenti Thaçi, kryeministri Haradinaj e ministri i Jashtëm Pacolli, për të postuar në rrjetet sociale foto nga takimet e zhvilluara.
Përveç kësaj, krerët kosovarë kanë shkuar në OKB pa një qëndrim unik rreth dialogut me Serbinë, pasi dihet se presidenti Thaçi dhe kryeministri Haradinaj kanë qëndrime të ndryshme rreth korrigjimit të kufijve si pjesë e një marrëveshjeje potenciale me Serbinë.
Vrapimi pas Trumpit…
Liderët që udhëtuan në SHBA nuk lanë rastin pa u krekosur kinse takuan presidentin amerikan, Donald Trump. Presidenti Thaçi realizoi fotografinë e zakonshme me Trump dhe bashkëshortet.
Dhe siç pritej Thaçi bëri reklamë duke e quajtur një takim me presidentin e SHBA-ve edhe pse sigurisht nuk kishte gjë më shumë se një foto.
Ndërkaq rasti i ministrit të Jashtëm, Behgjet Pacolli me takimin e Trump është për libër Genisit. Pacolli si nga qielli i doli Trumpit vetëm për t’ia zgjatur dorën. Por pa fije turpi Pacolli shkroi në Facebook se kishte kënaqësinë që u takua “për herë të dytë” me Trump. Por, videoja që e shoqëronte këtë mbishkrim dëshmonte të kundërtën. Pacolli nuk e takoi Trumpin, por i doli në pritë të parit të SHBA-së, për t’i shtrënguar dorën.
Dhe më pas vet Pacolli e mori vesh se e teproi duke deklaruar se veç i ka shtrënguar duart me Trump.
“Kënaqësi të ja shtrëngoj dorën Presidentit Donald Trump!!!”, dha versionin e fundit Pacolli, ndërsa edhe ka prerë pjesën e videos, ku dukej qartë se bëri disa përpjekje për arritur deri te dora e Trumpit.
Megjithatë, videoja e plotë e zv.kryeministrit u bë virale dhe tashmë po bëheshin interpretime qesharake
Si Thaçi ashtu edhe Pacolli, sigurisht që “takimin” me Trump mundohen ta shesin për konsum të brendshëm.
Pacolli gafat e tij nuk i ndali me kaq. Ai i ndërhyri kryeministres serbe Ana Brnabiç, derisa kjo po jepte intervistë. Ajo i tha ku e mori lejen për të hyrë në sallë, ndërsa Pacolli vazhdoi me gafat duke i thënë kryeminsitres serbe “nga ju”.
Dhe incidenti tjetër që shkaktoi Pacolli është shqetësimi që i bëri kryeministrit të Marokos, Saadeddine Othmani. Të paktën kështu deklaroi ky u fundit.
Pacolli shkroi në Twitter se pati takim të frytshëm me delegacionin e Marokut në të udhëhequr nga kryeministri i këtij shteti.
“Diskutim produktiv me kryeministrin maroken, Saadeddine Othmani për raportet Kosovë-Marok dhe për vullnetin tonë për stabilizimin e këtyre raporteve diplomatike, ashtu që të mund të bashkëpunojmë në të gjitha sferat për interes të përbashkët”, shkroi Pacolli.
Por, kryeministri i Maroku,e demantoi keq Pacollin. Ai shkroi në Twitter se derisa po qëndronte me delegacionin e tij në Nju Jork, një burrë nga Kosova iu imponua. Bëhej fjalë për “burrështetasin” Behgjet Pacolli.
“Gjatë pushimit me delegacionin tim një zotëri nga Kosova na u imponua me prezencën e tij. Ne nuk kemi diskutuar marrëdhëniet bilaterale as vazhdimin e kontakteve”, shkroi kryeministri maroken.
Ai tutje tregoi se shteti i tij nuk ndryshon qëndrim ndaj Kosovës, as pas imponimit të Pacollit.
“Pozita e Marokut është e njëjtë. Maroku nuk e njeh Kosovën dhe nuk ka marrëveshje me të”.
Përveç këtyre gafave, vlen të theksohet se tre krerët e shtetit pas çdo takimi ishin tejet aktiv në rrjetet sociale ku shtyheshin me njëri-tjetrin se kush po i poston i pari takimet që zhvillonin në OKB.
Në të gjitha postimet ku liderët kosovarë shihen duke buzëqeshur, deklarojnë se kanë marrë mbështetje për Kosovën, por asnjëri prej tyre nuk premtojnë të paktën ardhjen e një njohje të re. /tesheshi.com/
