Nga Blendi Gashi
2017-ta përveç që mbahet mend si vit i tensioneve politike dhe dy parë zgjedhjeve, do kujtohet edhe si vit i “dajakut” për gazetarët, pasi u rritën ndjeshëm sulmet ndaj tyre krahasuar me vitet paraprake.
U tregua qartë se institucionet gjegjëse janë të paafta për t’i mbrojtur njerëzit e mediave, ku krejt çfarë bëri drejtësia është ndëshkimi me kusht ose me gjobë i sulmuesve.
Gjatë 2017-tës janë regjistruar gjithësejt 38 raste të sulmeve dhe kërcënimeve ndaj gazetarëve, duke shënuar kështu vitin më të rëndë, pasi më 2016, Asociacioni i Gazetarëve të Kosovës ka regjistruar 12 raste të kërcënimeve dhe sulmeve, ndërsa 15 raste në vitin 2015, duke përfshirë kërcënimet, sulmet fizike, frikësimet dhe dëmtim të pronës.
Vetë gazetarët kanë organizuar protesta për të dënuar sulmet, por edhe për të kërkuar më shumë mbrojtje. Por, ato ranë në vesh të shurdhër. Mungesa e një sistemi të drejtësisë që dënon kërcënuesit dhe sulmuesit i dha edhe më shumë zemër atyre që t’i sulmojnë gazetarët edhe fizikisht në rrugë.
Disa nga rastet kur u sulmuan dhe kërcënuan gazetarët:
Drejtori i gazetës online “Insajderi”, Parim Olluri, u sulmua në gusht të 2017-tës derisa ishte duke shkuar në banesë me të fejuarën e tij.
Olluri tha se u sulmua pas publikimit të një serie hulumtimesh për ish-komandantët e Ushtrisë Çlirimtare të Kosovës, duke vënë në pah pasurimin e tyre.
Krejt çfarë ka arritur policia është të zbardhë fytyrat e sulmuesve falë kamerave të lokaleve ku ka ndodhur rasti, por ka dështuar t’i arrestojë ata.
Fatin e Ollurit e përcjelli edhe kolegun e tij tek “Insajderi”, kryeredaktorin Vehbi Kajtazi i cili u sulmua në tetor në pikë të ditës në një nga lokalet e qytetit.
Sulmuesi Fitim Thaqi nga Llapushniku sipas fotove shihet se është një person i afërt me shumë njerëz për të cilët kishte raportuar Kajtazi, si ish-deputetin Azem Syla, pastaj ish-gazetarit, tani deputetin e NISMA-s Milaim Zeka.
Ai pas disa ditësh me kërkesë të policisë është vetë-dorëzuar, por u lirua shpejt nga burgu duke u dënuar vetëm me burgim me kusht.
Gazetari Taulat Osmai nga kallxo.com u sulmua derisa po kryente punën e tij në teren, konkretisht në komunën e Gjilanit, derisa po raportonte për një protestë.
Gazetari Mentor Gjergjaj i gazetës online “Express” u kërcënua nga truproja i Fatmir Limajt, i cili ia fotografoi kartelën e punës dhe tentoi që me dhunë t’ia fshijë fotot në telefon, të cilat i shkrepi teksa Limaj po takohej me presidentin Hashim Thaçi në natën kur tentohej të shfuqizohej ligji për Gjykatën Speciale.
Familja e gazetares Saranda Ramaj të gazetës “Koha Ditore” nga një zyrtar publik u kërcënua nga Ejup Simnica, auditor nga Zyra e Auditit i cili mori guximin të trokas në derën e familjes së gazetares në Radavc të Pejës ku prindërve të saj i ka lënë një vizitë kartë duke u thënë që të mos vazhdoj më të raportoj për të.
Gazetarja Salie Osmankaq” e gazetës “Koha Ditore” u kërcënua nga “uzurpatorët” e banesave në lagjen “Dardania”, në Prishtinë.
Gazetari Musa Mustafa nga Mitrovica, është kërcënuar me vrasje nëpërmjet një mesazhi telefonik. Ai kërcënohet me vrasjen e tij dhe zhdukjen e familjes “nëse shkruan kundër serbëve”.
Poashtu u kërcënua edhe gazetari Vullnet Krasniqi i portalit satirik “Kukunews”, pasi publikoi disa lajme satirike në këtë portal.
Këto raste por edhe shumë të tjera që ndodhën më 2017-tën dhe paaftësia e organeve të drejtësisë për t’i kapur e dhënë dënimin e merituar sulmuesve nuk jep shpresë se 2018-ta do jetë vit më i mirë për gazetarët. /tesheshi.com/
