Kryengjarja për shqiptarët në vitin 2015 do të mbetet natyrisht kualifikimi historik për kampionatin europian të Futbollit “Francë 2016”. Një ngjarje që ka eklipsuar shumë nga zhvillimet në vend, pasi përbën një piketë për herë të parë të përfaqësimit të Shqipërisë në një event të tillë ndërkombëtar.
Kuqezinjtë e Giani de Biasit dhanë maksimumin në të gjitha ndeshjet eleminatore duke mos pasur asnjë shenjë inferioriteti edhe pse u përballën me skuadra të mëdha si Franca, Portugalia, Danimarka, Serbia dhe Armenia.
Humbja në Elbasan Arena me Serbinë nuk ka ndikuar në rezultatin final duke ardhur në festën e madhe që u zhvillua pas ardhjes nga Armenia.
Duke u rikthyer tek ngjarjet e tjera të bujshme, në 2015 kemi pasur “bombën” e Tom Doshit ku akuzoi kreun e Kuvendit, Ilir Meta për atentat ndaj tij por që më pas përfundoi i hetuar së bashku me shokun e tij dhe kolegun Mark Frroku.
Ngjarja me Tom Doshin krijoi të çarën e parë mes koalicionit të majtë, që gjithsesi nuk u vu re në fillim.
Megjithatë ngjarja me Tom Doshin hapi dyert e bukrgut edhe për Mark Frrokun që u akuzua për 4 akuza, ndër të cilat vrasja me paramentim më e rënda; arrestimin më pas të Armando Prengës pas konfliktit me fisin Cali, por edhe dorëheqjen e deputetit Arben Ndoka.
Në Kuvend hyri një politikan i pazakontë që për muaj do të jetë nën efektin e mediave, jo për politikë por për showbiz. Ai quhet Eduard Ndocaj që thirret me nofkën “kaubojsi”.
Pikërisht, këto procese ndaj deputetëve sollën në fjalorin politik fjalën “dekriminalizim” që me insistimin e opozitës sollën miratimin e një ligji që do të largojë të gjithë ata politikanë që vërtetohen që kanë qenë të dënuar më parë, por më pas kanë ndryshuar identitetin.
Nga janari deputetët do të lënë shenjat e gishtave për t’iu dërguar Interpolit.
Ngjarje tjetër e rëndësishme e vitit 2015 ishin zgjedhjet lokale të 21 qershorit, që sollën në detyrë 61 kryebashkiakë që drejtojnë njësi krejt të reja territoriale.
Erjon Veliaj u zgjodh kryetar bashkie i Tiranës nga një koalicion i gjerë që niste nga e majta ekstreme e përfundonte të Shpëtim Idrizi dhe Bamir Topi.
Zgjedhjet u cilësuan sërish me probleme, edhe pse u çertifikuan si pasojë e ngjarjeve në Vorë por dhe zona të tjera ku pati akuza për presione dhe blerje votash.
Menjëherë pas zgjedhjeve, pas humbjes në disa bashki të rëndësishme LSI akuzoi PS-në për tradhti dhe Ilir Meta nisi një ftohje të gjatë me Edi Ramën, e cila vazhdon.
Marrëdhëniet u acaruan edhe më shumë pas shpërthimit të skandalit CEZ-DIA dhe deklarimeve të Kastriot Ismailajt në prokurori.
Opozita kërkoi largimin e Metës, ndërkaq që dy muaj më vonë avancoi në largimin e qeverisë. Lulzim Basha vendosi të shpallë mosbindjen civile dhe nisjen e një stine protestash që më 8 dhjetor pati si kulm djegien e një bunkieri simbolik pranë Ministrisë së Brendshme.
Por ajo që në fakt ka qenë politikisht ngjarja e viti, ishte paraqitja publike e ambasadorit amerikan në Tiranë, Donald Lu. Ai së bashku me kolegen e BE-së, Vllahutin po udhëheq një fushatë për pastrimin e politikës. Lu deklaroi se reformën në drejtësi e pengojnë vetëm ministrat e korruptuar dhe deputetët kriminelë. Ndërkaq, gjyqtarëve u kërkoi të shikonin orët e dorës dhe jetën luksozë.
Një grup ekspertësh ka hartuar një draft për reformën në drejtësi, i cili është dërguar në Komisionin e Venecias dhe të presë opinionin e saj. /tesheshi.com/
