Nga Blendi Gashi
Presidentja Atifete Jahjaga do të mbahet mend gjatë në skenën politike kosovare pas largimit nga Presidenca. Jo vetëm pse është e para femër presidente, për mënyrën se si u zgjodh (nga zarfi), por edhe si kryetarja e shtetit që brenda dy viteve për shkak të krizës politike në vend luajti rolin e ndërmjetësues mes liderëve të partive politikë.
Gaz lotësjellësi ‘detyron’ Jahjagën të mbledh liderët
Bllokada e Kuvendit dhe tensionet e ngritura pozitë-opozitë, pas nënshkrimit të marrëveshjeve të fundit me Serbinë në Bruksel dhe mos lëshimi pe nga asnjëra pale ka bërë që Jahjaga t’iu dërgojë ftesa liderëve të partive politike kosovare për dialog politik.
Edhe këtë vit, Jahjaga do të ‘lodhet’, duke pritur e përcjellur drejtuesit e subjekte politike në kërkim të zgjidhjes dhe rikthimit të normalitetit në Kuvend.
Mirëpo, partitë opozitare shprehen të vendosura se edhe pas takimit me presidenten nuk do ta ndryshojnë mendimin.
Analistët janë shprehur disa herë se takimet e thirrura nga Jahjaga janë vetëm sa për të përmbushur presidentja detyrimin e saj kushtetues dhe nuk pritet që ato të përfundojnë me gjetjen e ndonjë zgjidhje.
Zyra e Bashkimit Evropian në Kosovë, përmes një deklarate ka vlerësuar se thirrja e Presidentes bërë partive politike për dialog, është hapi i duhur drejt zgjidhjes së situatës politike të krijuar në Kosovë.
Jahjaga takime ‘maratonike’, edhe më 2014-të
Edhe gjatë vitit 2014-të, Jahjaga ishte tepër e zënë. Arsyeja, sërish kriza politike. Ajo për të gjetur një zgjidhje politike kishte mbajtur disa takime maratonike me partitë politike.
Marrëveshja u arrit në Zyrën e Jahjagës, por për të ndodhur kjo u nevoit ndërhyrja e ish-amabasdores Tracey Ann Jacobson në prezencë të së cilës u nënshkuar marrëveshja e koalicionit mes PDK-së dhe LDK-së.
Mbetet të shihet se sa takime do të ndodhin në Presidencë mes palëve për të tejkaluar bllokadën e krijuar në Kuvend, apo sërish do të duhet ndërhyrja e ndërkombëtarëve që të arrihet një zgidhje në mënyrë që institucioni ligjvënës t’i kthehet normalitetit apo të arrihet ndonjë marrëveshje tjetër që mund të dërgonte vendin në zgjedhje të parakohëshme. /tesheshi.com/
