Sot u bënë 20 vjet nga rënia e ushtarit të UÇK-së, Luan Haradinaj, vëllait të Ramush Haradinajt. Ai ra heroikisht në njërën prej betejave të para të UÇK-së kundër forcave pushtuese serbe, më 6 maj të vitit 1997, në kufirin shqiptaro- shqiptar.
E për ta kujtuar atë, sot në Gllogjan përveç anëtarëve të familjes Haradinaj kurora lulesh tek varri i Luanit vendosën edhe ish-ushtarë të UÇK-së dhe qytetarë. Ndonëse nuk morën rrugën për në Gllogjan, Luanin e kujtuan edhe kryekuvendari Kadri Veseli dhe nënkryetari i Kuvendit Xhavit Haliti. Me një shkrim në Facebook, Veseli ai përkujton si thotë “njërin nga luftëtarët e parë të UÇK-së”.
“Sot, në 20 vjetorin e rënies, nderojmë njërin nga luftëtarët e parë të Ushtrisë Çlirimtare të Kosovës, heroin Luan Haradinaj. Vitet kalojnë, por kujtimi për Luanin dhe mijëra dëshmorë të lirisë është i gjallë dhe i fuqishëm në zemrat tona. Vepra dhe sakrifica e tyre është gurthemel i lirisë dhe i shtetit tonë të pavarur, republikës së Kosovës”, ka shkruar Veseli.
Kurse, Haliti thotë se për të Luani ishte më shumë se vëlla.
“Sot, bëhen 20 vjet nga rënia e njërit nga pjesëtarët e parë të Ushtrisë Çlirimtare të Kosovës, Luan Haradinaj. Ai ra në krye të detyrës për të ndihmuar grupin për të hyrë në Kosovë. Por, fitoi pavdekësinë. Luanin e kisha më shumë sesa vëlla. Ai ishte vërtet luan i UÇK-së. Ishte ndër të rrallët i përgatitur për të vepruar në Kosovë dhe në Shqipëri. Për të gjitha detyrat e ngarkuara, Luani asnjëherë nuk tha: ‘jo, nuk mundem’. Ishte i përpiktë dhe jo rrahagjokës. Luani meriton të nderohet dhe të respektohet përjetësisht nga kombi shqiptar”, ka shkruar Haliti në Facebook.
LDK kujton vrasjen e profesor Fehmi Aganit
Në dallim nga dy zyrtarët e lartë të institucioneve ligjvënëse, asnjë fjalë nuk ka thënë kryeministri Isa Mustafa në kujtim të heroit Luan Haradinaj. Ndoshta kjo heshtje e tij vjen nga inati që ka me AAK-në dhe Ramushin që nuk po lë gurë pa lëvizur për ta rrëzuar qeverinë aktuale.
Por LDK-ja sot gjatë ditës ka kujtuar 18 vjetorin e vdekjes së profesorit dhe politikanit Fehmi Agani, ku sekretari Ismet Beqiri dhe deputetë të saj kanë vënë kurora lulesh tek varri i tij
Në anën tjetër as kryekuvendari nuk ka shkruar të paktën një mesazh me rastin e 18 vjetorit të vrasjes së profesor Aganit.
Ja si u vra Luan Haradinaj
Luan Haradinaj ra dëshmor në një prej betejave të para të UÇK-së më 6 maj të vitit 1997. Në këtë ditë, Luan Haradinaj, bashkë me të vëllain Ramushin dhe grupin e përbërë nga Fehmi e Xhevë Lladrovci, Selim Krasniqi e Ramiz Lladrovci, Abedin Rexha e Ilaz Kodra, Rafet Rama e Gani Rama, Emrush Xhemajli dhe Ali Ahmeti, u nisën për në Kosovë.
Kishin arritur sipër fshatit Larë, fshat ky që ndodhet afër Kushninit të Hasit, në vendin e quajtur “Qafa e Mullarit”, kur grupi bie në një pritë që kishte zënë ushtria jugosllave, në kufirin shqiptaro-shqiptar. Në këtë pritë vritet Luan Haradinaj, plagoset Rafet Rama, e po ashtu edhe Ramush Haradinaj dhe Fehmi Lladrovci.
Ja si u vra Fehmi Agani
Më 6 maj 1999, Fehmi Agani, së bashku me familjen e tij, tentoi të linte Kosovën me tren. Në kufirin me Maqedoninë, treni u kthye mbrapsht. Diku afër Fushë Kosovës, policia ndaloi trenin dhe urdhëroi të zbrisnin të gjithë. Dëshmi të ndryshme të botuara në shtyp thonë se Fehmi Agani u mor ose në një autobus së bashku me burra të tjerë shqiptarë, ose i vetëm me policët brenda një makine private. Kufoma e tij u gjend të nesërmen buzë një rruge gjithë baltë, pranë Lipjanit.
Përgatiti: Blendi Gashi – tesheshi.com
