Ka mbërritur në Kosovës edhe ish-sekretarja amerikane e SHBA-së Madeleine Albright. Albright, e cila ka qenë sekretare gjatë kohës së luftës në Kosovë, ka qeë njëra ndër avokueset kryesore për të nxjerrë vendin nga lufta.
Është pikërisht ish-presidentja e Kosovës, Atifete Jahjaga, e cila priti edhe ish-presidentin Bill Clinton, ajo që tani është takuar me Albright.
“Jam krenare që, njëzet vite pas çlirimit, të mirëpres në Kosovë ish-Sekretaren Amerikane të Shtetit, Madeline Albright- njërën nga kontribueset më të fuqishme në lirinë dhe pavarësinë tonë. Vendosmëria dhe përkushtimi i Sekretares Albright për ta ndalur gjenocidin në Kosovë dhe për t’ia kthyer lirinë dhe shpresën një populli të shtypur ishin kruciale për të ardhmen e popullit tonë. Sekretarja Albright, e cila ishte e pakompromis ndaj dhunës që regjimi i Millosheviqit po ushtronte në Kosovë, sot erdhi në një Kosovë që kultivon vlerat për të cilat ajo është angazhuar- lirinë, demokracinë, tolerancën dhe paqen”, ka shkruar Jahjaga.
Vizitat nga personalitetet në fjalë vijnë në 20 vjetorin e çlirimit të vendit nga lufta. Kosova ende përmendet si shembull i intervenimit të suksesshëm të NATO-s për t’i dhënë fund gjenocidit të shkaktuar nga ish-republika jugosllave. Shembuj të ngjashëm që NATO ka arritur sukses si të Kosovës, megjithatë kanë munguar, për shkak të natyrave tjera të konflikteve. /tesheshi.com/
