20 milionë jemenas në nevojë të ngutshme për ndihmë

Ndërsa kriza dhe luftimet vazhdojnë në Jemen, numri i jemenasve të prekur nga lufta dhe që kanë nevojë për ndihmë humanitare rritet çdo ditë.

“Mbi 20 milionë njerëz vlerësohet tani të kenë nevojë për një formë ndihme humanitare, 9.3 milionë nga të cilët janë fëmijë,” deklaroi Jeremy Hopkins, zëvendëspërfaqësuesi i UNICEF-it, nga kryeqyteti Sana.

Organizata “Mjekët pa Kufij” ka bërë të ditur se sistemi i kujdesit shëndetësor të qytetit të Adenit, ku janë zhvilluar një pjesë e mirë e luftimeve, po rrënohet për shkak të konfliktit. Sipas saj, spitalet janë të mbushura me viktima, rrugët janë plot me trupa të vdekur, dhe ka një mungesë të theksuar të ushqimeve, ilaçeve dhe lëndëve djegëse. Për shkak të bombardimeve, aktivistët e kësaj organizate nuk janë në gjendje të lëvizin në qytet për t’u dhënë ndihmë të lënduarve.

Kombet e Bashkuara e kanë përshkruar gjendjen në Jemen si katastrofike, duke theksuar se 80 për qind e popullsisë ka nevojë për ndihmë.

“Pavarësisht rezultateve të bisedimeve të paqes, duhet të hiqen menjëherë bllokada dhe të gjitha pengesat për furnizimin me ndihma humanitare. Ndryshe kanë për të vdekur më tepër fëmijë nga sëmundjet e parandalueshme,” është shprehur një drejtues i organizatës Save the Children.

Situata në Jemen u përkeqësua në shtatorin e vitit të shkuar, kur husinjtë, rebelët shiitë të mbështetur nga Irani, morën kontrollin e kryeqytetit të Jemenit pas një kryengritjeje të armatosur, duke e detyruar qeverinë të largohej drejt Adenit.

Rebelët po bombardohen nga ajri që nga 25 marsi nga avionët e një koalicioni të udhëhequr nga Arabia Saudite. Ndërkaq, forcat proqeveritare vijojnë të luftojnë me husinjtë në tërë vendin, për të penguar përparimin e tyre. /tesheshi.com/