Përfaqësia e Uashingtonit në Tiranë e “ka bërë njësh” presidentin Meta me opozitën PD-LSI, në paralajmërimin e dhënë mbi tubimin që ka thirrur kreu i shtetit për më 2 mars.
Kjo pasi ambasada amerikane ka paralajmëruar se dhe aty mund të ketë dhunë.
“Pika e grumbullimit që është lajmëruar është Bulevardi Dëshmorët e Kombit. Tubimi politik pritet të zhvillohet në 2 Mars 2020 duke filluar rreth orës 17:00 pasdite. Kohëzgjatja e tubimit të pritshëm nuk dihet. Në demonstratat e kaluara ka pasur dhunë.
Forcat e sigurisë kanë përdorur ujë dhe gaz lotsjellës për të shpërndarë turmat. Shmangni vendet e mundshme të protestës përfshirë Bulevardin Kombëtar. Monitoroni median për azhornimet. Jini të vëmendshëm dhe mbani një profil të ulët“, thuhet në një njoftim të selisë në “Rrugën e Elbasanit”.
Por Meta u përgjigj në stilin e tij të kohëve të fundit, dukë thënë se “asnjë alert për datën 2 mars, për qytetarët shqiptarë dhe të huaj që jetojnë dhe do të mbërrijnë në Tiranë!”.
“Përkundrazi, jemi shumë të lumtur që këtij Manifestimi madhështor Mbarëkombëtar do t’i bashkohen edhe mbi 200 shqiptaro-amerikanë, të cilët na kanë konfirmuar pjesëmarrjen në 2 mars dhe një pjesë e të cilëve sapo kanë mbërritur në Atdhe”, shkruan njeriu në Presidencën shqiptare. /tesheshi.com/
