Në 4 vitet e qeverisjes së kaluar sektorët shtetërore që merren me pronat, ALUIZNI dhe ZVRPP, i kanë shkaktuar shtetit të paktën 2.4 miliardë lekë të reja dëm.
Kjo shifër del nga një raport i fundit i Kontrollit të Lartë të Shtetit që ka bërë tek zyrat e legalizimeve dhe hipotekat. Por kjo nuk është një shifër e saktë, pasi vetë KLSH pretendon se shifra mund të jetë më e madhe pasi ka dhe një dëm të fshehur që nuk mund të llogaritet.
Sipas KLSH, për periudhën 2013-2017, në këto dy institucione janë ushtruar 40 kontrolle auditi, nga të cilat 22 në zyrat e regjistrimit të pronave dhe 18 në drejtoritë rajonale të ALUIZNI-t.
“Janë rekomanduar: 137 masa “largim nga puna”, 134 masa “vërejte deri në largim nga puna”, si dhe janë kallëzuar penalisht: 196 punonjës dhe drejtues të ALUIZNI dhe ZVRPP”- bën të ditur KLSH.
Sipas KLSH nga 40 auditime (në total), të zhvilluara nga KLSH në këto institucione (ALUIZNI dhe ZVRPP), përgjatë periudhës 2013 – 2017, në 36 prej tyre (90%) KLSH ka hartuar dhe depozituar pranë organeve përkatëse të prokurorisë në rrethe kallëzime penale për 196 punonjës të këtyre institucioneve të nivelit: ish-Drejtues, Përgjegjës Sektori dhe Specialistë (mesatarisht janë kallëzuar rreth 5 persona për çdo subjekt të audituar)./tesheshi.com/
