Janë mbushur 19 vjet nga demonstratat studentore të cilat lëvizën përfundimisht situatën e rëndë politike të viteve 90-ta.
Më 1 tetor 1997, nën thirrjen e Unionit të Pavarur të Studentëve të Universitetit të Prishtinës, me përkrahjen e rektorit Ejup Statovci dhe mbështetjen e të gjithë studentëve, u mbajt demonstrata e cila bëri që e gjithë vëmendje botërore t’i kthejë sytë nga Kosova.
Në protestë të gjithë studentët kishin veshur këmisha ose bluza të bardha si shenjë paqeje dhe bartnin pankarta ku kërkohej lirimi i objekteve të uzurpuara arsimore.
Demonstrata studentore ishte paqësore, por u kthye në të dhunshme pas ndërhyrjes brutale të forcave serbe.
Në ballë të saj ishin Rektori Ejup Statovci, drejtuesit e UPSUP-së me kryetarin Bujar Dugolli, e anëtarët e kryesisë Muhamet Mavraj, Albin Kurti e Driton Lajçi.
19 vjet pas një prej organizatorëve kryesorë të protestave studentore të vitit 1997, Muhamet Mavraj, përmes një postimi bërë në Facebook ka treguar se nga ajo kohë filloi të flitet ndryshe në Kosovë dhe për Kosovën.
Ai ka rikujtuar se ajo kohë ishte me e lavdishmja edhe për shkak të unitetit veprues në tërë Kosovën.
“Sot është përvjetori i 19-të i protestave të 1 tetorit 1997. Dëshiroj me gjithë zemër t’ua uroj këtë ditë të gjithë pjesëmarrësve të protestës në të shtatë qendrat e mëdha të Kosovës, ku kishim fakultete dhe shkolla të larta (Prishtinë, Pejë, Gjakovë, Mitrovicë, Ferizaj, Prizren e Gjilan); Urime të gjithë studentëve, profesorëve, qytetarëve patriotë që u solidarizuan pavarësisht presioneve të forta politike, patriotëve të patundur të lëvizjeve kombëtare brenda e jashtë vendit, institucioneve fetare të të gjitha besimeve tona që u solidarizuan plotësisht me ne. Me gjithë shpirt përkujtoj studentët dëshmorë, uroj familjet e tyre dhe i jap respekt e përkujtim rektorit Statovci. Miq, më sa di, deri më sot, ajo ditë ka qenë dita më e madhe e unitetit veprues, pavarësisht ndonjë rasti të izoluar. Aty ishim të gjithë. Më pas filloi të flitet ndryshe në Kosovë e për Kosovën. Urime!”, ka shkruar Mavraj. /tesheshi.com/
