Së paku 19 persona janë vrarë natën e kaluar, kurse 45 të tjerë janë plagosur, në qytetin japonez Sagamihara, në afërsi të Tokios, kur një person ka mësyrë me thikë në një institucion që kujdesej për personat me aftësi të kufizuara.
Policia deri më tani ka konfirmuar vdekjen e 15 personave. Agjencia Kjodo ka njoftuar se policia ka arrestuar autorin 20-vjeçar të aktit makabër, që siç thuhet është dorëzuar vetë në ambientet policore dhe ka pranuar kryerjen e sulmit.
Banorët e qytetit Sagamihara thonë se kjo është vrasja e parë e kryer pas 10 vitesh në këtë qytet.
Vrasësi ka qenë më herët i shtruar në një institucion psikiatrik, dhe kishte shprehur gatishmërinë për t’i vrarë personat me aftësi të kufizuar në rast se qeveria do ta miratonte një vendim të tillë, kanë njoftuar sot autoritetet lokale.
Policia e qytetit në qytetin Tsukui, në afërsi të Tokios, në fillim të këtij viti kishte kontaktuar me të dyshuarin, pasi ai ia kishte dorëzuar letrën me propozimin e tij të çuditshëm kryetarit të Dhomës së Ulët të parlamentit japonez; ndërkaq, më 19 shkurt ai është shtruar në spital, bën të ditur Reuters.
Ai është nxjerrë nga institucioni psikiatrik më 2 mars, pasi mjekët kishin vlerësuar se gjendja e tij ishte përmirësuar.
Vrasje të tilla në masë janë jashtëzakonisht të rralla në Japoni, dhe kryesisht përfshijnë therje me thikë.
Japonia, përndryshe, ka ligje shumë strikte për armët, dhe posedimi i tyre nga popullata është e rrallë. /tesheshi.com/
