Askush nuk i kalon amerikanët, sa i takon bujarisë në lënien e bakshisheve. Kjo për shkak se në Shtetet e Bashkuara të Amerikës, lënia e bakshishit është shndërruar në një ritual të zakonshëm, në ndryshim nga shumë vende të tjera, siç janë këta 18 vende të listuara nga Business Insider, në të cilat shpesh mjafton të thuash “faleminderit” për të shprehur mirësinë dhe kënaqësinë e marrë nga shërbimi që ju është ofruar.
Në këto vende, normalisht që nuk është e palejueshme të lësh bakshish, por normalisht nuk është aspak e detyrueshme.
Australia
Paga minimale e një kamerieri në Australi është 15.38 dollarë në orë, në krahasim me 2.13 dollarë në orë, që është në Amerikë.
Belgjika
Lënia e bakshishit nuk është e detyrueshme dhe në veçanti, në restorante dhe në taksi, shërbimi përfshihet në faturë.
Kina
Askush nuk lë bakshish pasi është e paligjshme (për shembull në taksi) dhe konsiderohet një veprim jo i sjellshëm. Gjatë viteve të fundit gjërat kanë ndryshuar disi, por nëse ju bie rasti të shkoni në Kinë, mos u habisni nëse jua kthejnë deri në qindarkën e fundit.
Koreja e Jugut
Zakonisht bakshishi nuk pranohet pasi gjithçka është e përfshirë në faturë. Por lënia e bakshishit për taksistët konsiderohet si një gjest i vlerësuar.
Danimarka
Me ligj, në restorante shërbimi i ofruar dhe bakshishi i kamerierëve është i përfshirë në çmim, ndaj nuk është e pranueshme lënia e një bakshishi ekstra.
Estonia
Në bazë të ligjit nuk është e lejuar që të përfshish në çmim apo në llogarinë totale të shërbimit, bakshishin për kamerierët, por kjo nuk do të thotë se nuk mund të lini një bakshish për shërbimin e marrë.
Finlanda
Shërbimi është gjithmonë i përfshirë në çmim, ndaj nuk është e udhës të lihet bakshish tjetër.
Franca
Restorantet janë të detyruar të përfshijnë shërbimin në çmimet e tyre, ndaj nuk është e detyruar të lësh një bakshish ekstra, vetëm në rastet kur dëshiron vetë klienti.
Japonia
Për shumë qytetarë të këtij vendi, bakshishi është një ofendim i vërtetë. Në rast se me të vërtetë doni të shprehni vlerësim për shërbimin e marrë, këshillohet që paratë t’i vendosni në një zarf ose në një fletë.
Islanda
Shërbimi përfshihet kudo, si në llogarinë në restorant apo edhe në tarifën e taksisë: si pasojë nuk është e këshillueshme të lihet bakshish ekstra.
Itali
Përgjithësisht në fund të çdo fature në restorant është një shtesë nga një deri në tre euro, e cila shkon për kamerierët si bakshish, ndaj nuk është e udhës të lini para të tjera. Gjithsesi, nëse dëshironi të lini bakshish tjetër, do t’jua pranojnë dhe falenderojnë.
Malajzia
Në restorante nuk lihen zakonisht para ekstra, pasi në llogari parashikohet që 10% e shërbimit do të shkojë për mbulimin e taksave dhe të bakshishit të kamerierëve. Në lokale, në të kundërt, nëse klienti dëshiron një shërbim të shpejtë, bën mirë t’i ofrojë që në fillim diçka ekstra kamerierit.
Zelanda e Re
Sikurse dhe në Australi, edhe këtu pagat e kamerierëve dhe të personelit janë shumë të mira, ndaj bakshishet nuk janë të detyruara. Por, nëse mendoni se keni marrë një shërbim të përsosur, paratë ekstra mund t’i vendosni në një zarf.
Singapori
Nuk është e udhës të lihet bakshish, duke marrë parasysh se për kamerierët dhe për stafin shkon 10% e parave që ju paguani në llogarinë tuaj. Nëse doni të lini diçka ekstra, sigurohuni që t’ia jepni kamerierit në dorë.
Slloveni
Lënia e bakshishit nuk është e detyruar, por gjithsesi, nëse e bëni do të cilësohet si një gjest bujarie dhe do të mbajeni mend.
Suedi
Taksa 10% për shërbimin është e përfshirë në çmim, ndaj lënia e një bakshishi ekstra nuk është detyrim.
Zvicër
Shërbimi përfshihet në llogarinë që ju paguani në restorant, ndaj nuk është e nevojshme shtimi i parave ekstra. Duhet shtuar që edhe pagat e kamerierëve dhe pjesës tjetër të stafit janë shumë të mira.
Vietnam
Bakshishi nuk është pjesë e kulturës vietnameze, por nëse klienti dëshiron të lejë diçka si shenjë e mirënjohjesh dhe vlerësimit për shërbimin që i është ofruar, ai pranohet. Veç të tjerash, një pjesë e madhe e hoteleve e restoranteve të luksit e kanë të përfshirë në faturë çmimin për shërbimin./tesheshi.com/
