Një stuhi e fuqishme, me erëra të forta, ka bërë që një vinç 80-tonësh të bjerë mbi ca ngrehina të përkohshme, duke u marrë jetën 18 personave, e duke lënë të plagosur 18 të tjerë.
Ngjarja ndodhi në provicën Guangdong, në qytetin Dongguan, në juglindje të Kinës.
Brenda ambienteve, që nuk ishin gjë tjetër, veçse kontenierë të përshtatur, gjendeshin 139 punëtorë në momentin e rënies së vinçit gjigand.
Pjesa më e mirë e tyre arriti të shpëtojë, por nga të mbeturit nën rrënoja, 18 vdiqën, e po kaq u lënduan. Katër prej të plagosurve janë në gjendje të rëndë.
Siç bën të ditur agjencia kineze e lajmeve Xinhua, operacioni i shpëtimit ka përfunduar. Në të njëjtën kohë, ka nisur një hetim për shkaqet e rënies së vinçit. /tesheshi.com/
