Sot mbushen 17 vjet nga fillimi i bombardimeve të NATO-së mbi caqet ushtarake serbe në Kosovë dhe në Serbi.
Sulmet që filluan pas dështimit të bisedimeve në Rambuje, u bënë me urdhër të sekretarit të përgjithshëm të NATO-s Havier Solana.
Pas 78 ditëve të bombardimeve, që filluan në mbrëmjen e 24 marsit të vitit 1999, dhe largimit të forcave policore dhe ushtarake serbe nga Kosova, u krijuan kushtet për kthimin e shpejtë të një milion shqiptarëve të Kosovës, që ishin strehuar, kryesisht në Shqipëri dhe Maqedoni, por edhe në shumë vende të botës. Ata ishin larguar nga dhuna e autoriteteve të Serbisë.
Me 24 mars të vitit 1999, NATO-ja e prirë nga SHBA-të, filluan bombardimet e para kundër caqeve ushtarake e policore të Serbisë pushtuese në Kosovë. Ky përvjetor shënohet si ditë e shpëtimit kombëtar për popullin shqiptar të Kosovës, por edhe si shkëndijë për vendosjen e paqes dhe stabilitetit në rajonin e Ballkanit Perëndimor dhe më gjerë.
Emra burrështetas, ushtarakë, diplomatë e ambasadorë por edhe qytetarë të Republikës së Kosovës, e cilësojnë këtë ngjarje (24 marsin 1999) si hapin e parë të lirisë së Kosovës, vendosjen e paqes këtu, por edhe ruajtjen e vet kredibilitetit të NATO-s. Ky vlerësim vjen për faktin se Aleanca ushtarake e NATO-s nuk mund të toleronte qe makineria e rëndë ushtarake e policore e Serbisë të udhëhequra nga kryekasapi i Ballkanit, Slobodan Milosheviq, të shfaroste një popull të tërë, të cilët jetonin në tokën dhe atdheun e vet.
Fushata e NATO-s që zgjati 78 ditë, është vlerësuar nga liderët e institucioneve të Kosovës si jetike për popullin e Kosovës. Intervenimi i NATO-s në Kosovë, ishte nevojë imediate, por edhe përgjegjësi qytetare e njerëzore.
/tesheshi.com/
