Zero infeksione në Tiranë, aty ku nisën rastet e para të koronavirusit në Shqipëri, e ku ishte epiqendra për javë me radhë. Ky është lajmi më pozitiv i pandemisë koronare në Shqipëri që kur nisën masat kufizuese.
Por nga ana tjetër, ka një lajm negativ për një tjetër rritjeje të infektimeve në shkallë vendi, ku në “dele të zezë” po shndërrohet Kruja me më shumë raste të reja se rrethet e tjera.
Janë 25 infektime të reja, ndërkohë që shifra më e lartë është regjistruar më 4 prill, me 29 raste në 24 orë. Ç’prej asaj dite ka patur vetëm ulje, e cila arriti në 6 në 24 orë, për të patur uljen-gritje të kufizuara.
Nga Instituti i Shëndetit Publik, Dr. Albana Fico dha detajet:
“Në 24 orët që lamë pas rezultatet e situatës epidemiologjike janë si më poshtë:
Janë testuar 242 persona të dyshuar me COVID-19.
Nga rezultatet e testimeve janë konfirmuar 25 raste pozitive me COVID-19.
Vijon hetimi epidemiolog jik dhe gjurmimi i kontakteve në Krujë ku kanë rezultuar pozitivë 17 persona dhe në Kurbin ku kemi 8 raste të reja. Sot është dita e parë që nga fillimi i epidemisë që Tirana nuk ka asnjë rast të ri.
Deri në këto momente janë testuar 6017 raste të dyshuara dhe prej tyre janë të konfirmuar pozitivë me COVID-19, 609 raste.
Gjatë 24 orëve të fundit, 18 pacientë të tjerë i janë shtuar listës së të shëruarve, duke e çuar numrin e të shëruarve nga COVID-19 në 345.
Aktualisht në vendin tonë janë 238 persona të infektuar aktivë dhe siç shihet numri i të shëruarve është më i lartë. Kjo tendencë tashmë vazhdon pa luhatje prej më shumë se një jave”.
Ndërkohë, kujtojmë se prej 4 ditësh nuk ka asnjë humbje jete. /tesheshi.com/
