Në kuadër të 15-vjetorit të themelimit të LSI-së, një ish-ministër e aktualisht figurë e saj, Edmond Panariti, rrëfeu një përvojë personale me themeluesin Ilir Meta. I ftuar në Top Talk të TCH, Panariti tha:
“…Mund t’ju tregoj një detaj të hollësishëm që e kam patur si përvojë direkte. Ka qenë lëvizja e dytë me Ilir Metën në takimin prezantues dhe promovues timin në Berat. Unë i bëra një pyetje metës: Nuk mund të duroje edhe pak ti brenda Partisë Socialiste dhe të shikoje të ardhmen tënde brenda PS-së. Natyrisht që do t’i vinte momenti Ilir Metës si dikush që priti dhe tashmë është në krye të PS-së (pra Rama). Më tha: Panarit nuk e ke kuptuar thelbin e iniciativës sime, të nismës sime për LSI. Në atë parti ishin shtresuar shumë probleme, ishte e pamundur që zgjidhja të kërkoheshe brenda. Nga ana tjetër vendi kishte nevojë për një alternativë, për një frymë të re dhe LSI pati pikërisht këtë mision për t’u krijuar si një forcë, e cila në një farë mënyre shkallmoi kalcifikimin e shtresuar nga bipolariteti politik dhe natyrisht u krijua si një platformë mundësisht për ata intelektualë, profesionistë që nuk e gjenin veten në politikë”, tha Panariti.
Sipas tij, znj.Kryemadhi, bashkëshortja e Metës, po e kryen më së miri misionin e saj si pasardhëse e tij në drejtimin e LSI-së.
“Ilir Meta erdhi në një moment të caktuar, historik, themelues, ndërkohë që ne jemi përsëri nën një moment tranzicioni dhe dalëngadalë, themeluesit duhet t’ia lënë vendin brezit të ri dhe nuk ka përson më të përshtatshëm që mund ta garantojë këtë tranzicion se Monika Kryemadhi. Ajo ka punuar, ka rritur Lëvizjen Rinore për Integrim” u shpreh Panariti. /tesheshi.com/
