Nga Mensur Krasniqi
Kanë filluar batutat në adresë të ministrit të Ekonomisë dhe njëherit shef i Shtabit Zgjedhor Qendror të BDI-së, Bekim Neziri. Ai, para simpatizantëve të BDI-së në qendrën e kulturës në Tetovë duke raportuar për projektet e realizuara gjatë qeverisjes 2013-2015 ka lëshuar një deklaratë mjaft komike duke theksuar sе “15 mijë aktivistë si ju, (pra i drejtohet të pranishmive në sallë) vërshojnë çdo vendbanim për një fitore të madhe të BDI-së duke pasur si lider Ali Ahmetin i cili e ka dëshmuar veten si një lider i fuqishëm që nga vitet e 80-ta, poashtu edhe në 2001-shin, por edhe tani”.
Ndaj kësaj deklarate të Nezirit, ka reaguar gazetari i njohur në Maqedoni, Muhamed Zekiri. Ai në profilin e tij në rrjetin social facebook ka shkruar kështu: “BDI i paska mbledh 15 mije vetë në Pallatin e Kulturës në Tetovë i cili ka kapacitet për 600 veta. Interesant”.
Ndërkohë edhe kryetari i organizatës joqeveritare “ECO GUERILLA”, Arianit Xhaferi poashtu në rrjetin social facebook ka ironizuar deklaratën e Bekim Nezirit.
“Në rast nevoje, protestën e rradhës do e mbajmë në Pallatin e Kulturës, por ju lutem që mos grumbulloheni më shumë se 15,000”, shkruan në profilin e tij, Arijanit Xhaferi.
Duke pasur parasysh që Pallati i Kulturës në Tetovë ka gjithsej 600 ulëse, dhe nëse të pranishëm kanë qenë 15 mijë “aktivistë” të BDI-së, ashtu siç pretendon Bekim Neziri, sipas matematikës i bie që në çdo ulëse ka pasur nga 25 persona?! /tesheshi.com/
