Bavarezët, jo më zhgënjime: e nisin mbarë Bundesligën

Bajerni i Mynihut e nis me këmbën, por edhe kokën, e mbarë Bundesligën këtë sezon, duke mundur rivalët e Bajer Leverkusen 3-1. Bavarezët e nisën me presing ndeshjen dhe trajneri Ançeloti kishte zbritur në fushë 3 blerje nga 4 që bavarezët kanë bërë.

Pikërisht njëri prej tyre, mbrojtësi Niklas Shyle, shënoi me kokë pas një goditjeje dënimi. Debutim shumë të mirë bënë dhe blerjet e mesfushës, gjermani Rudi e francezi Toliso. Pikërish ish-lojtari i Lionit, shënoi me kokë pas një aksioni që vijoi një goditje këndi.

Leverkusen u përpoq të luajë shpejt dhe nuk u mbyll në mbrojtje. Voland e Belarabi vunë në vështirësi portierin Ulrajsh, që zëvendësonte Nojerin e dëmtuar. Shiu i nisur që në mbyllje të pjesës së parë shtyu disa minuta rinisjen e së dytës.

Në fillim të saj, Alaba kroson nga e majta, Levandovski pengohet por gjyqtari vijon lojën. Më pas ndalet dhe kërkon ndihmën e sistemit VAR, e pasi rishikon aksionin, rikthen vendimin dhe jep penallti për Bajernin. Vetë Levandovski shënon dhe çon shifrat në 3-0.

Bavarezët u përpoqën të kontrollonin lojën dhe rrezikuan me Robenin e aktivizuar 30 minutat e fundit. Por janë “aspirinat” e Leverkusen që shënojnë me Mehmedin.

Me shifrat 3-1 u mbyll takimi i parë në kampionatin gjerman, me skuadrën e Ançelotit që mbetet skuadra për t’u mundur. Për më tepër që të premten, munguan Nojer, Boateng, Tiago Alkantara dhe Hamed Rodriguez. /tesheshi.com/