Luçiano Moxhi është bërë shumë shpejt i plotfuqishëm tek Partizani. Presidenti Gazmend Demi “i ka varur në qafë”, çelësat e klubit dhe tashmë italiani ka përgjegjësinë për ta nxjerrë kampion Partizanin, në fushë.
Sipas informacioneve nga klubi i të kuqve, mësohet se Moxhi po bisedon me ish-trajnerin e Luftëtarit, serbin Mladen Milinkoviç, për të drejtuar pankinën e skuadrës për sezonin e ardhshëm.
Ndërkohë italiani ka lidhur kontakte të rëndësishme në Itali, për të bërë një merkato të fuqishme në vendin fqinj, kryesisht me lojtarë të huazuar.
Klubi bën të ditur se do të ketë afrime të rëndësishme në çdo repart. Një mbrojtës qendre, dy mesfushorë dhe të paktën “një sulmues të rëndë”, janë objektivi i Moxhit.
Pas paraqitjes jo edhe aq dinjitoze të zhvilluar në kupat e Europës, lojtarët janë lënë pushim, ndërkohë që tifozët presin me kërshëri, kush do të zëvendësojë Ekubanin e Torasën në sulm, apo Cetkoviçin e Ramadanin në mesfushë.
Megjithatë, me një drejtor si Moxhi, shpresat dhe surprizat, duhen mbajtur pranë. /tesheshi.com/
