Cristiano Ronaldo vazhdon të fitojë trofe si në klubin ku luan, Realin e Madridit, ashtu edhe planin individual. Por “më i miri i botës” për këtë vit, mund edhe të kishte qenë pjesë e Juventusit, në fitoret e shumta që ka arritur në karrierë.
Sipas një zbulimi të bërë nga France Futboll, portugezi ka qenë fare pranë Juves në vitin 2003, por marrëveshja nuk është arritur “për faj” të kilenit Marcelo Salas që luante asokohe me Juventusin. (Pra Salas, e jo Salës apo Sajes të ekipeve tona politike)
Ka qenë Luçiano Moxhi ai që “i kishte vënë syrin” Ronaldos dhe kishte paraqitur një ofertë për Sporting-un e Lisbonës, ekip ku luante 17-vjecari në atë kohë. Oferta ishte që italianët të paguanin 2.5 milion euro, plus t’i jepnin Sportingut sulmuesin Salas.
Vetë portugezët ranë dakord për shkëmbimin, por ishte Salas që nuk pranoi të luante në Lisbonë, i cili u transferua tek River Plejt në Argjentinë.
Për rrjedhojë, Sporting kërkoi nga Juventus të paguante 10 milionë “të plota” për Ronaldon, shifër që u duk e lartë për klubin torinez.
Atë sezon Ronaldo u ble menjëherë nga Manchester United i Sër Aleks Ferguson, i cili ndikoi shumë në rritjen profesionale dhe personale të portugezit.
Me pak fjalë, të mos qe për atë dreq kapriçozi Salas, Juventus do të kishte sot lojtarin më të mirë në botë. /tesheshi.com/
