Në Maqedoni dhe në Bosnjë e Hercegovinë sot do të shënohen 13 vite nga vdekja e ish presidentit të Maqedonisë, Boris Trajkovski, i cili e humbi jetën në fatkeqësi ajrore në Rotimle në afërsi të Mostarit.
Si shenjë kujtimi të 13-vjetorit të vdekjes së Trajkovskit, në varrin e tij në Butel të Shkupit do të vendosin lule pjesëtarë të familjes së tij, disa delegacione dhe qytetarë.
Shënimi i vdekjes së Trajkovskit do të bëhet edhe para sallës sportive “Boris Trajkovski” në Shkup.
Kujtojmë se në fatkeqësinë ajrore që ndodhi më 26 shkurt të vitit 2004 përveç presidentit Boris Trajkovski humbën jetën edhe delegacioni tetë-anëtarësh i Maqedonisë, i cili ka udhëtuar për në konferencë ndërkombëtare në Mostar.
Për fatkeqësinë e cila ndodhi në atarin e fshatit Rotimle, në afërsi të Mostarit, për shkaqet e rënies së “kingerit”, për atë nëse ka ndodhur fatkeqësi aeroplani apo ka qenë “terrorizëm”, prej atëherë e deri më tani janë kryer dy hetime dhe janë publikuar dy raporte, të dy komisioneve me të cilët kryesuan Sallko Begiq dhe Omer Kupiq, e në të cilët morën pjesë edhe ekspertë nga Maqedonia.
Në të dy raportet, të cilët dallojnë nga njëri-tjetri, megjithatë, si shkak për rënien e “kingerit” ceken gabimet e pilotit dhe lëshime të tjera indirekte të sistemit.
Po ashtu, për Boris Trajkovskin thuhet të ketë thyer mitin dhe paragjykimet se shqiptarët dhe maqedonasit nuk mund të kenë një jetë multietnike, pasi që në zgjedhjet presidenciale pjesa dërmuese e popullit shqiptarë, përveç votës së tyre për Boris Trajkovskin me kënaqësi të madhe kanë shkuar edhe në tubimet e fushatës zgjedhore të tij. /tesheshi.com/
