I gjithë rezultati i takimit mes presidentit Meta dhe opozitës jashtëparlamentare, ka qenë kërkesa unanime e tyre, si një grup politik më vetë, për zgjedhje të parakohshme, si parlamentare e si vendore, në një ditë. Kujtojmë se kjo ka qenë një kërkesë e mëhershme e kreut të shtetit, sapo shpalli 13 tetorin e tij si datë zgjedhjesh pas anullimit të 30 qershorit, që në një ditë të vetme, të ketë madje dhe zgjedhjet referendare për zgjedhjen nga populli të Presidentit të Republikës.
Pas takimit, kreu demokrat Basha deklaroi se “nuk mund të ketë asnjë alibi për të vonuar zgjedhjet e parakoshme parlamentare dhe zgjedhjet lokale kushtetuese. Do të marrim të gjitha hapat e nevojshme si opozitë për zgjedhjet e prakohshme dhe do i bëjmë thirrje edhe qytetarëve shqiptarë për të marrë pastaj të gjitha hapat e nevojshme”.
Kjo deklaratë e tij u pasua nga ajo e presidentit Meta që tha se “Kreu i Shtetit përshëndeti hapat e ndërmarra nga opozita për miratimin pa asnjë vonesë të reformës zgjedhore, si dhe qëndrimin publik të Opozitës së Bashkuar për zhvillimin e zgjedhjeve të parakohshme të menjëhershme, me qëllim kthimin e legjitimitetit të munguar Kuvendit të Shqipërisë dhe rivendosjes së dialogut politik në institucione”.
Por ndërkohë që po kërkohen zgjedhje të parakohshme, Meta ende ka në fuqi dekretin për zgjedhje lokale më 13 tetor, të cilin nuk e ka anulluar. /tesheshi.com/
