Sapo janë mbyllur katër takime në kuadër të eliminatoreve për Kupën e Botës të dy viteve më pas. Ka patur një lumë golash në to, me dy prej takimeve të mbylluar me të njëjtin rezultat, 5-0.
Dy prej sfidave i përkasin grupit E, e pikërisht ato që kanë patur rezultatet më të thella. Rumania ka fituar 0-5 ndaj Armenisë në Jerevan. Stancu, Popa, Marin, Stanciu dhe Chipciu kanë qenë shënuesit për ballkanasit.
Në të njëjtin grup, Mali i Zi ka fituar po 5-0 ndaj Kazakistanit. Rumania dhe Mali i Zi mbajnë përkohësisht kryesimin në grupin E, me nga katër pikë.
Sfida Azerbajxhan – Norvegji, e vlefshme për grupin C, është fituar 1-0 nga azerët. Medvedev është shënuesi i vetëm i ndeshjes së luajtur në Baku. Kjo është fitorja e dytë e Azerbajxhanit, pas asaj ndaj San Marinos një muaj më parë me të njëjtin rezultat.
Në “Wembley”, Anglia ka fituar 2-0 ndaj Maltës, me dy golat të shënuar që në pjesën e parë nga Sturridge dhe Alli. Anglia ka patur në stol për herë të parë si trajner Gareth Southgate-in, i vënë në atë post për një kohë të shkurtër pas shkarkimit të Sam Allardyce-it.
Gjashtë pikë ka Anglia në grupin F, tani për tani në kryesim, ndërsa katër ekipet e tjera do të duhet të luajnë ndeshjet e dyta. /tesheshi.com/
