Sot janë bërë 11 vjet prej ndarjes nga jeta të ish-presidentit kosovar, Ibrahim Rugova, i cili vdiq më 21 janar 2006, pasi humbi betejën nga kanceri në mushkëri.
Vdekja e Rugovës është pritur me dhembje e pikëllim të madh në mbarë Kosovën, dhe të gjitha trojet ku ka shqiptarë, ndërsa në funeralin e tij morën pjesë personalitete nga mbarë bota.
Rreth një milion qytetarë të Kosovës me orë e me ditë, në dimër e acar, pritën për t’i dhënë lamtumirën prijësit të tyre politik e shpirtëror, krijuesit të avarësisë se Kosovës.
Mbi gjashtëdhjetë delegacione shtetërore të kontinenteve e vendeve erdhën për t’i bërë nderimet e fundit bashkëpunëtorit, i cili me kulturë e durim kishte krijuar rrjetin e miqësisë për popullin e vendin e vet, duke u bërë vetë ikona e imazhi i këtij vendi e kësaj miqësie.
E, çdo vit radhazi në përvjetorët e vdekjes, Rugova kujtohet për kontributin e dhënë në arritjen e pavarësisë së Kosovës.
Këtë përvjetor, në kujtim të Rugovës u urganizuan aktivitete vetëm nga LDK, por jo edhe institucionet e vendit.
Drejtues e LDK-së bëri homazhe tek varri dhe vizitoi familjen e tij, derisa u mbajt edhe një akademi përkujtimore.
Për dallim nga vitet paraprake kur presidentja Atifete Jahjaga organizonte akademi përkujtimore për Rugovën, një gjë të tillë nuk e ka bërë presidenti Hashim Thaçi, dikur rival i madh i Rugovës.
Megjithatë, ky i fundit përmes një shkrimi në Facebook ka njoftuar se ka bërë homazhe te varri i Rugovës, derisa ka shkruar se “me veprimtarinë politike dhe intelektuale, me rezistencën e tij paqësore, presidenti Rugova dha kontribut të jashtëzakonshëm për shtetin e Kosovës”.
Mbetet të shihet gjastë ditës nëse kryekuvendari Kadri Veseli do bëj apo jo homazhe por nuk ka paralajmëruar një gjë të tillë, e as vizitë te familja Rugova.
Rugova ishte Presidenti i parë i Republikës së Kosovës, duke shërbyer në vitet 1992–2000 dhe përsëri në vitet 2002–2006, ishte Intelektual,politikan, akademik dhe shkrimtar shqiptar. Rugova mbante titullin Doktor.
Përveç një prej themeluesve të LDK-së, Rugova ishte kryetar i saj që nga themelimi i saj më 23 dhjetor të vitit 1989 deri kur ndërroi jetë.
Për shkak të rolit të tij në historinë e Kosovës, Rugova është quajtur “Ati i Kombit” dhe “Gandi i Ballkanit”, ndërsa pas vdekjes është shpallur Hero i Kosovës.
Përgatiti: Blendi Gashi – /tesheshi.com/
