Ndryshe nga kreu i opozitës Basha që 105-vjetorin e Policisë e ka parë si një jubile denoncimi për atë që ai e gjykon se ka shkuar e po shkon keq e më keq nën qeverisjen e Ramës, ky i fundit ia dedikon pikërisht policisë “së tij”, atë që e quan nxjerrjen e Shqipërisë nha harta e kanabisit.
“Jemi shumë krenarë për gjithçka është bërë në këtë periudhë rilindjeje të policisë pas asaj situate kaosi të vitit 2013. Jemi krenarë që mund të flasim me gjuhën e thatë të rezultateve, përtej opinioneve që kemi për këtë rilindje të Policisë së Shtetit. Gjuha e rezultateve thotë se në vitin 2017 Shqipëria doli nga harta e vendeve që kultivojnë e trafikojnë lëndë narkotike. Shqipëria mbylli një plagë të vjetër e të thellë. Sot, nuk ka as Lazarat dhe as Lazaratër të shpërndarë në territorin e saj”, u shpreh kryeministri Rama.
Dhe siduket i ndërgjegjshëm për një bilanc jo pozitiv sa i përket prangosjes së krimit, Rama ofroi një tjetër tregues, që sipas tij e tregojnë policinë luftëtare krimi. “Policia ka hequr nga duart e organizatave kriminale mbi 40 milionë euro pasuri dhe garantoi numrin më të ulët të vrasjeve në historinë e statistikave pas vitit 1990”, theksoi shefi i qeverisë. /tesheshi.com/
