Presidenti i Republikës, Bujar Nishani, njëkohësisht Komandant i Përgjithshëm i Forcave të Armatosura uroi sot 104-vjetorin e Ushtrisë Kombëtare. Ai e ka vlerësur ecurinë dhe rolin e ushtrisë shqiptare që nga dita kur u formësua, si një organizim që i ka siguruar vendit integritet kombëtar, me aq mundësi e kapacitet sa ofronte.
“Edhe pse jo e institucionalizuar, qëndresa ushtarake e shqiptarëve nuk ka qenë kurrë zero. Me aq mundësi ushtarake sa kemi pasur, kemi siguruar mbijetesën dhe integritetin kombëtar. Shqipëria ka sot një Ushtri profesioniste, që forcohet dita-ditës, duke pasur synime të qarta për përsosjen dhe modernizimin e saj. Sot Forcat tona të Armatosura kanë historinë e vet. Kanë martirët dhe dëshmorët e vet. Nderim përjetë kontributit dhe sakrificës së tyre!”, u shpreh Nishani.
Sipas tij, 4 Dhjetori, për të gjithë ushtarakët dhe për të gjithë popullin është një ditë për të shprehur respektin, mirnjohjen dhe për të nderuar gjithçka bënë heronjtë, duke hapur rrugën e krijimit të ushtrisë moderne të Shqipërisë që sot renditet në Aleancën më të madhe politike dhe ushtarake e më të suksesshme të të gjitha kohërave, atë të Atlantikut të Veriut.
“Tashmë e kemi gjetur udhën. Po ecim pa u ndalur drejt një të ardhmeje të sigurtë me Forca të Armatosura që kryejnë më së miri rolin e vet në botën e sotme të turbullt me plot të papritura. Kishim ushtri “të madhe”, por nuk kishim Liri dhe eksportonim konflikt. Kemi ushtri “të vogël”, por kemi Liri dhe eksportojmë paqe.
Garantojmë sigurinë e vendit. Kemi pjesëmarrje shembullore në misione ndërkombëtare. Forca dhe vitaliteti i Forcave të Armatosura qëndron tek demokracia dhe liria”, përfundoi Nishani, duke ju uruar Forcave të Armatosura suksese në misionet e tyre të ardhshme./tesheshi.com/
