Nga Blendi Gashi
Sot bëhen 10 vjet nga demonstrata e përgjakshme e organizuar nga Lëvizja Vetëvendosjes në Prishtinë ku mbetën të vrarë dy protestues, Mon Balaj dhe Arben Xheladini nga plumbat e gomës së policëve rumunë të UNMIK-ut.
Po ashtu, u plagosën rëndë e lehtë edhe 80 protestues të tjerë, derisa u arrestuan dhjetëra aktivistë të VV-së.
Protesta e 10 shkurtit të vitit 2007 u mbajt për të kundërshtuar bisedimet për statusin e Kosovës që aso kohe mbaheshin në Vjenë me ndërmjetësim të presidentit Martti Ahtisaarit, që i parapriu shpalljes së Pavarësisë së Kosovës.
Protestës i printe atëkohë lideri i VV-së, Albin Kurti.
Dhjetë vjet pas nga protesta, për vrasjen e Balajt dhe Xheladinit ende nuk është dënuar askush.
Ja ç’thotë Kurti 10 vjet pas për protestën e 2007-tës
Albin Kurti, dhjetë vjet pas vlerëson se 10 shkurti i vitit 2007, si ngjarje politike nuk është dhe nuk mund të jetë e shkuar.
Ai thotë se dhjetë vjet më parë janë vendosur themelet e reja të përpjekjes për liri e vetëvendosje, përpjekje që sipas tij vazhdon edhe sot e kësaj dite me intensitet edhe më të shtuar.
“10 shkurti i vitit 2007 ishte vetë përcaktim i së ardhmes. Kjo datë është e tashmja e paralajmëruar jo vetëm për atë që alarmonte, sidomos për atë që shënjonte: se vullneti për liri e vetëvendosje nuk mund të negociohet, andaj nuk mund të ketë kompromis mbi të dhe për të. Ndërkaq, emrat Mon Balaj dhe Arben Xheladini janë emrat e dy dëshmorëve, dëshmitarë të përpjekjes sonë, por edhe dy paraprijës të drejtimit tonë politik, si organizim e si koncept”, ka deklaruar Kurti, në një intervistë për gazetën “Epoka e Re”.
Kurti, thotë se UNMIK-u e ka pranuar fajin për vrasjen e Arben Xheladinit dhe Mon Balajt por sipas tij, për zhvillimin e një procesi penal, pengesë mbetet imuniteti i pjesëtarëve të policisë rumune që vranë më 10 shkurt.
AI: UNMIK të kërkojë falje për mosmbrojtjen e Balajt dhe Xheladinit
Organizata Amnesty International i ka bërë thirrje misionit të OKB-së në Kosovë “që të kërkojë falje për dështim në mbrojtjen e jetës së Mon Balajt dhe Arben Xheladinit dhe të gjithë të lënduarve të tjerë” në demonstratën e 10 shkurtit në Prishtinë.
Amnesty gjithashtu kërkon që “të gjithë të ankuarve t’u jepet dëmshpërblim i plotë për dëmin e përjetuar”.
Në një raport të tij të publikuar të premten, Amnesty International i ka bërë thirrje Përfaqësuesit të Posaçëm të OKB-së që të zbatojë në tërësi rekomandimet e bëra në pinionin e marsit të vitit 2015 me të cilin kërkohet dëmshpërblimi për viktimat dhe familjet e tyre si dhe marrja e hapave të mëtejmë për të siguruar se autorët janë sjellë përpara drejtësisë.
Në raportin e AI më tej thuhet se “plumbat e kauçukut ishin jashtë afatit të përdorimit dhe ishin shkrepur drejt në demonstrues nga një numër prej 10 pjesëtarë të policisë rumune”.
Vetëvendosje sot në kujtim të dy aktivistëve të saj të vrarë bën homazhe tek varret e tyre, hap një ekspozitë me fotografi për protestat e 10 shkurtit 2007 dhe organizon tribunë me temën “Plani i Ahtisaarit dhe tezat e Vetëvendosjes!”.
Video: protesta e 10 shkurtit 2007
