Tashmë jemi mësuar të dëgjojmë gjithçka përsa i takon transferimeve të futbollistëve gjatë merkatos, qoftë kjo e dimrit apo e verës. Më poshtë janë paraqitur 10 deklaratat më të bujshme të bëra në vitet e fundit nga presidentët apo drejtuesit e klubeve të Serisë A.
Silvio Berlusconi 2002
“Blerja e Alessandro Nestës? Nuk është e mundshme. Janë gjëra që nuk kanë më asnjë lidhje me realitetin ekonomik, apo me moralin. Në futboll kemi gabuar të gjitha. Tani mjaft”. Këto kanë qenë fjalët e presidentit të Milanit një ditë para se kuqezinjtë të zyrtarizonin blerjen e Nestës për 60 miliardë lireta (rreth 30 milionë euro).
Luciano Moggi 1997
Një nga personazhet më të rëndësishme të futbollit italian ka qenë Luciano Moggi, i cili ka realizuar disa nga operacionet më të bujshme në merkato. “Avokat, janë shpikje gazetash”, i ka thënë ai Gianni Agnellit kur ky e ka pyetur nëse ishte e vërtetë shitja e Vierit tek Atletico Madrid. Zyrtarizimi ka ardhur një ditë më vonë.
Corrado Ferlaino 1989
“Premtim? Por unë nuk të kam bërë asnjë premtim”. Kjo është ajo që presidenti i Napolit, Corrado Ferlaino, i ka bërë Maradonës, ditën e fitores së Kupës UEFA. Argjentinasi ishte zotuar të udhëhiqte skuadrën drejt triumfit europian në këmbim të shitjes te Marseille, ndërsa presidenti napolitan bëri sikur nuk mbante mend asgjë. Për t’u hakmarrë Diego qëndroi dy muaj me pushime.
Fabbrizio Miccoli 2012
“Nuk doja të isha një ushtar, për këtë arsye jam larguar nga Juventusi”, ka thënë ish-sulmuesi italian. Në të vërtetë ka qenë Juvja që e ka shitur menjëherë te Fiorentina për të siguruar paratë që i duheshin dhënë Ajaxit për Ibrahimovic.
Angelo Ogbonna 2011
“Nuk do të shkoj kurrë tek Juventusi, të mos bëjmë shaka!”. Kjo ka qenë deklarata e Angelo Ogbonnas në kohën kur luante për rivalët e Torinos. Një deklaratë që do të përgënjeshtrohej dy vite më pas kur mbrojtësi u vesh bardhezi.
Adriano Galliani 2012
Një nga momentet më të vështira për “popullin milanist” ka qenë ai i shitjes së Ibrahimovic dhe Thiago Silvës. “Zlatan dhe Thiago nuk do të largohen nga Milani”, ka thënë Adriano Galliani para se të dy lojtarët të shiteshin po atë verë te Paris Saint Germain.
Parma e Juventus 1995
“Figo është i yni!” Kjo ka qenë thirrja e përbashkët e dy klubeve gjatë merkatos dhe kanë pasur të drejtë të dyja palët. Lojtari ka nënshkruar për të dy klubet: Federata Italiane e Futbollit nuk e ka lënë të shkojë tek asnjëra skuadër duke e kthyer te Sporting Lisbon, që më pas e ka shitur te Barcelona.
Antonio Cassano 2011
Njihet për bëmat e tij brenda dhe jashtë fushës së lojës. Një nga këto “bëma” ka qenë edhe deklarata e 2011-ës kur ka thënë se: “Milani do të jetë skuadra ime e fundit”, para se të largohej drejt Interit dhe më pas drejt Parmës.
Angelo Massimino 1983
Presidenti i Catanias: “Po shkoj në një vend që nuk dua t’ia zbuloj emrin për të blerë dy lojtarë brazilianë”.
Claudio Lotito 2008
Numri një i Lazios njihet për deklaratat e tij të bujshme, por mund të thuhet me lehtësi se shtatë vite më parë ka shkuar përtej limiteve duke deklaruar se: “Zarate vlen sa Messi”.
Përgatiti: Drilon Sylejmani – /tesheshi.com/
