Dhjetë vajza kosovare, ose çika siç u thonë ndryshe, pretendojnë se kanë kaluar orë tmerri natën e 15 nëntorit teksa po lëviznin përgjatë Rrugës së Kombit. Pasi kanë festuar ditëlindjen e njërës prej tyre në një nga restorantet më të njohura në Lezhë, rreth mesnatës janë nisur për të shkuar në Prishtinë, në shtëpitë e tyre.
Dhe, duke lëvizur me dy atomjetet të ndryshme, ato kanë vënë re se një motorçikletë po i ndiqte. Mbi të ka qenë një person i armatosur, i cili i ka kërcënuar duke qëlluar disa herë në ajër.
Ky është versioni paraqitur prej tyre në policinë e Lezhës, e cila nga ana e saj thotë se ka bërë patrullim në zonën e Repsit, aksit ku vajzat kanë pretenduar se dikush po i ndiqte me motorçikletë, por pa konstatuar asgjë.
Nga ana e tyre, vajzat janë rrëfyer në një gazetë kosovare, ku veç tmerrit të pretenduar gjatë udhëtimit, janë ankuar dhe për mosangazhim të policisë shqiptare. Por kjo e fundit, ka përgënjeshtruar duke thënë se vajzat kanë qenë dhe kontraditore në dëshmitë e tyre, e se policia ka vepruar me profesionalizëm dhe operativitet.
Rruga e Kombit vërtet paraqet rrezikshmëri, por ky është një rast i rrallë kur policia dyshon që vajzat nuk kanë qenë të sinqerta në denoncimet e tyre, ndërsa këto të dytat pretendojnë se janë policët ata që nuk e kanë kryer detyrën siç duhet. /tesheshi.com/
