Vetëvendosje, përmes një aksioni simbolik në sheshin “Skënderbeu” në Prishtinë, me rastin e Ditës Botërore të punëtorit, 1 Majin, ka paraqitur kushtet e vështira që sipas tyre e karakterizojnë jetën e punëtorëve në vend.
Me një baner ku figuron paga prej 5 mijë e 213 euro e drejtorit të Trustit Pensional, kjo parti ka ngritur shqetësime për klasën punëtore.
Paga prej 130 eurove për punëtorët nën moshën 35 vjeç dhe ajo prej 170 euro për punëtorët mbi 35 vjeç-kanë figuruar si statistika për krah pagës së të parit të Trustit.
Anëtarja e VV-së, Nazlie Bala, tha se shteti u ka shpallur luftë punëtorëve, duke shtuar po ashtu se të papunët nuk janë shifra, por janë njerëz.
Kujtojmë se sot për herë të parë Bashkimi i Sindikatave të Pavarura të Kosovës (BSPK) organizon protestë për 1 Maj, në shenjë pakënaqësie për mosrespektim të drejtave të punëtorëve, për dallim nga vitet tjera që zakonisht thirrnin për festë. /tesheshi.com/
