Një masë e jashtëzakonshme besimtarësh muslimanë kanë qenë dje të pranishëm në faljen e namazit të xhumasë në Xhaminë e Madhe në Mekë.
Sipas raportimit nga Saudi Gazette, 1.5 milionë ka qenë numri i pelegrinëve në faljen e këtij namazi, të ardhur për të kryer njëkohësisht haxhin.
Predikimin e xhumasë e ka mbajtur imami dhe hatibi i Xhamisë së Madhe, shejh Fajsal Gazzaviu, i cili e ka vënë theksin në shmangien e lëndimit të ndjenjave të pelegrinëve.
Një paralajmërim ka ardhur prej tij për shfrytëzimin e haxhit për kapital politik, për përhapje të urrejtjes sektare, e për thirrje sloganesh në vendet e shenjta, duke i quajtur ato format më të këqija të apostazisë.
Ai ka kërkuar gjithashtu të kihet kujdes për të mos krijuar kaos, për të mos prishur qetësinë shpirtërore, e për të mos cenuar sigurinë e vendit.
“Në të gjitha veprimet tona të adhurimit, duke përfshirë haxhin, ne duhet të praktikojmë teuhidin,” ka nënvizuar imami.
Haxhi i këtij viti është paraprirë nga deklarata e kundërdeklarata midis zyrtarëve iranianë e sauditë, reflektim i gjendjes së tensionuar midis dy vendeve.
Ndërsa iranianët kanë vënë në diskutim aftësinë e Arabisë Saudite për t’u garantuar siguri pelegrinëve, autoritetet saudite i kanë akuzuar ata për politizim të haxhit. /tesheshi.com/
