Kryetari i Kuvendit, Ilir Meta, gjatë fjalës së tij në sallën e Kuvendit, ditën e sotme deklaroi se duhet ti jepet fund njëherë e mirë shpifjeve dhe se për të nuk ka rëndësi rezultati i këtyre zgjedhjeve, por standardi i tyre.
Duke folur për vendimin e djeshëm të Gjykatës së Lartë në lidhje me dhunimin e deputetit Strazimri, Meta u shpreh: “E kam dënuar aktin e dhunimit të deputetit Strazimiri nga dy kolegët e mazhorancës. Ne kemi vepruar në mënyrën më transparente në raport me organet e Prokurorisë dhe Gjykatën. Ka ikur koha kur ndërhyhej tek serverat për të fshirë pamjet. Nuk kam qenë dakord për ekspozimin e atyre pamjeve, sepse ndikon në përkeqësimin e imazhit të politikanëve. Dje kemi pas një vendim të Gjykatesë së Lartë. Në radhë të parë duhet ta lexojmë atë dhe më pas ta gjykojmë. Nëse mendoni se është parlamenti që duhet ta gjykojë këtë çështje, hajdeni me konsensus të shikojmë rregulloren”.
Ai akuzoi opozitën se kanë krijuar një tension artificial dhe se po tentojë ta tejçoni atë në të gjithë vendin, në prag elektoral.
Duke folur për standardin e zgjedhjeve, z. Meta u shpreh se është hedhur shumë baltë mbi LSI-në dhe mbi atë personalisht.
“Nuk habitem, nuk shqetësohem. Të gjithë kanë sondazhet e tyre dhe nuk kanë gjë me mua. E kemi detyrë të gjithë të vëmë në lëvizje mekanizmat e sistemit ligjor. Në këtë mënyrë, opozita po dekurajon shumë nga përkrahësit e saj të marrin pjesë në votime dhe po lë në baltë një pjesë të kandidatëve të saj, të cilët synojnë të fitojnë, apo kanë hequr dorë nga kandidimi”- tha kreu i LSI-së.
Duke folur për ankesat në lidhje me spotin kundër blerjes së votave, Meta u shpreh se ku është një apel që shqiptarët të mos shesin votën por edhe të denoncojnë këtë fakt.
“Një ditë kam parë në RD një foto të një personi që pretendohej se ishte në një zyrë të LSI në Shkodër. Takova Luan Ramën dhe i kërkova të bëjë padinë në Gjykatë, që kjo çështje të hetohet dhe gjykohet. Nëse ekziston ky person, të dënohet dhe do të ketë mbështetjen time më të plotë drejtësia. Në rast se është një fotomontazh, kjo është një çështje tjetër. Ti japim fund një herë e mirë maskaradave të shpifjeve. Për mua nuk ka rëndësi rezultati i zgjedhjeve, por standardi i tyre”,- deklaroi kreu i Kuvendit.
Duke thënë se kanë ngelur edhe 8-9 ditë deri në zgjedhjet e 21 qershorit, ai bëri apel të mos e kthejmë Kuvendin në një situatë të tillë, duke qenë se do të nisë zbatimi i një reforme të madhe dhe të vështirë, e për këtë duhet të përpiqemi të mos kemi asnjë lloj vakumi në bashkitë e reja.
“Ftoj përfaqësuesit e opozitës që pavarësisht nga shqetësimet që ata kanë për zgjedhjet, të vazhdojnë të shtojnë kontributet e tyre në këtë drejtim”,- ishin fjalët e Metës.
Më herët, deputetja Jozefina Topalli deklaroi se drejtësia është nënshtruar nga kryeministri dhe se ky është fundi i demokracisë.
“Politikani e ka për detyrë ti japë besim njerëzve. Në besimin që i jep nuk ke garanci se cili do të jetë integriteti. Asnjëri prej nesh nuk e di se çfarë do të bëjë nesër në kushte presioni dhe kërcënimi. Drejtësia është nënshtruar dhe poshtëruar nga kryeministri Edi Rama. Ky është fundi i demokracisë”,- tha Topalli./tesheshi.com/
