Pas mbledhjes së kryesisë, Lulzim Basha ka thirrur në një takim drejtuesit e degëve të kësaj partie në rrethe.
Takimi ishte në vazhdën e diskutimeve dhe përgatitjeve për nisjen e një proçesi analize në lidhje me zgjedhjet e 25 qershorit.
Në takimin e zhvilluar me dyer të mbyllura, Basha ka informuar drejtuesit e degëve mbi hapat që do të ndiqen në këtë proçes, duke nisur nga dëgjesat me anëtarët deri te takimet konsultative.
Në këtë kuadër, javën e ardhshme pritet që Lulzim Basha të nxjerrë edhe udhëzimin përkatës, përmes të cilit angazhohen degët dhe drejtuesit e tyre, bashkë me grupet e punës dhe të deleguarit, për nisjen e analizës dhe proçesit të ristrukturimit në bazë të PD-së.
Puna do të nisë me seksionet dhe grupseksionet, ku do të mblidhen propozime për mënyrën e organizimit, të cilat më pas mund të pasojnë edhe me ndryshimet në statutin e PD-së.
Me zhvillimin e analizës dhe turit të konsultimeve në gjithë vendin, pritet që kryetari Lulzim Basha, të thërrasë edhe dy forumet kryesore të kësaj force polikë, Këshillin Kombëtar dhe Kuvendin Kombëtar të Partisë Demokratike.
Gjithashtu kryetarët e degëve janë informuar se paralelisht me procesin e konsultimit me anëtarësinë, një grup punë do të punojë për ndryshime në statut me qëllim të bëjë të mundur që zëri çdo i anëtari të Partisë Demokratike të dëgjohet për ta bërë këtë forcë më demokratike dhe më të fortë. /tesheshi.com/
