TË DHËNAT/ Shpërthimet në Sri Lanka: si ndodhi tragjedia dhe çfarë dihet për sulmuesit?

Numri i të vdekurve në Sri Lanka është rritur në 290 pasi një valë shpërthimesh goditën kishat dhe hotelet luksoze në të gjithë vendin.

Policia tha se 24 persona janë arrestuar, por ende nuk dihet se kush janë autorët . Sulmet e hovshme lanë edhe 500 persona të plagosur. Gjithashtu raportohet edhe për dhjetra të huaj në mesin e të vdekurve.

Të dielën, Kryeministri i Sri Lankës, Ranil Wickremesinghe tha se shërbimet e sigurisë kishin qenë “të vetëdijshme për informacionin” e sulmeve të mundshme, por informacioni nuk ishte zbatuar.

Si ndodhën sulmet?

Raportet e para  erdhën në ora 08:45 – me gjashtë shpërthime të raportuara brenda një hapësire të vogël kohore.

Tre kisha në Negombo, Batticaloa dhe në rrethin Kochchikade të Kolombo u vunë në shënjestër gjatë shërbimeve të Pashkëve dhe shpërthimet tronditën edhe hotelet Shangri-La, Kingsbury dhe Cinnamon Grand në kryeqytetin e vendit.

Një shpërthim tjetër kishte për synim një kopshtit zoologjik në Dehiuala, në jug të Kolombos dhe një shpërthim i tetë u njoftua pranë rajonit Dematagoda gjatë një bastisjeje policore, duke vrarë tre oficerë policie.

Të shtunën vonë, forcat ajrore thanë se një mjet shpërthyes i improvizuar ishte gjetur dhe asgjësuar pranë aeroportit kryesor të vendit në kryeqytet, Colombo.

Çfarë dihet për sulmuesit?

Mbetet e paqartë se kush është pas sulmeve, por 24 arrestime janë bërë nga policia.

Qeveria ka thënë se besojnë se bomba vetëvrasëse janë përdorur në disa nga vendet.

Azzam Ameen i BBC në Colombo thotë se sulmuesit mendohet të jenë pjesë e një “grupi radikal ekstremist” sipas autoriteteve.

Gjatë një konference shtypi të dielën në mbrëmje, kryeministri Ranil Wickremesinghe sqaroi pretendimet se zyrtarët kishin pasur informata paraprake për sulmet.

“Duhet të shqyrtojmë pse nuk u morën masa paraprake të mjaftueshme, as unë dhe as ministrat nuk u informuam”, tha ai.

“Tani për tani përparësia është të kapen sulmuesit”, shtoi ai.

Sulmet të cilat përkonin me të dielën e Pashkëve, shënojnë dhunën më të madhe vdekjeprurëse që nga përfundimi i luftës civile në vitin 2009. /tesheshi.com/

 

 

auto pjese dak

Related posts