728 x 90 Leaderboard

Shtëpia e Bardhë flet për shqetësim të Obamës për retorikën kundër muslimanëve

Zëdhënësi i Shtëpisë së Bardhë e ka përshkruar presidentin amerikan si thellësisht të shqetësuar për “retorikën politike” të drejtuar kundër bashkësisë muslimane në SHBA pas të shtënave masive në Kaliforni që vranë 14 persona.

“Presidenti është i shqetësuar mjaft për retorikën politike që ne e kemi parë të drejtuar te muslimanët,” ka thënë Josh Earnest, sekretari i shtypit i Shtëpisë së Bardhë.

Çdo përpjekje për ta margjinalizuar bashkësinë muslimane tejet patriotike në SHBA vetëm do të ndihmonte narrativën e organizatave terroriste si IS-i dhe El Kaeda, ka shtuar ai.

Ndërsa po u përgjigjej pyetjeve mbi frikën për një kundërpërgjigje ndaj bashkësisë muslimane pas vrasjeve në Kaliforni, Josh Earnest deklaroi: “Nëse ka disa hapa specifike që duhen ndërmarrë për të mbrojtur një xhami ndaj një kërcënimi të veçantë, unë kam besim të plotë se autoritetet lokale të ruajtjes së rendit janë të angazhuara në këtë përpjekje. Dhe nëse kanë nevojë për mbështetjen e qeverisë federale, jam i sigurt se ata do ta marrin atë.”

Earnest bëri me dije se presidenti amerikan ka shprehur shqetësimin për retorikën e papërgjegjshme politike dhe në ca raste fanatike të dëgjuar gjatë javëve të fundit. Obama, tha ai, nuk beson se kjo e bën vendin më të sigurt.

“E qartë është se Shtetet e Bashkuara, populli amerikan dhe qeveria amerikane duhet të punojnë me miliona amerikanë muslimanë patriotë në këtë vend për ta bërë vendin tonë më të sigurt,” theksoi zëdhënësi i Shtëpisë së Bardhë. /tesheshi.com/  

 

 

Related posts