728 x 90 Leaderboard

Shkup/ Shteti ngatërron dyqanin me panairin: kërkon kasë fiskale në këtë të fundit!

Masat e shtetit për fiskalizim të bizneseve, të cilat shpeshherë janë kritikuar nga ekspertët ekonomikë si të gabuara,  kanë acaruar situatën në Panairin e Mobiljeve që është hapur këto ditë në Shkup.

Inspektorët e tregut kanë ndërmarë aksion për të penalizuar ato kompani të cilat nuk kanë arka fiskale, por pa bërë dallim mes prodhuesve dhe shitësve, gjë e cila ka shkaktuar mllef të jashtëzakonshëm te prodhuesit.

Abedin Murati nga kompania “Molika” Tetovë, tha se në përvojën e tij 20-vjeçare në Panairin e mobiljeve në Shkup, atij asnjëherë më parë nuk i është kërkuar arkë fiskale, sepse panairi nuk është i destinuar për shitje klasike, por qëllimi kryesor është ekspozimi i mallit dhe pranimi i porosive të cilat do të punohen dhe shiten më vonë.

“Është në rregull të kërkohet arkë fiskale nga kompanitë të cila kanë ardhur në panair enkas për të shitur, por jo edhe nga prodhuesit siç jemi ne. Reagimet janë negative dhe mllefi i prodhuesve është tejet i madh, pasi inspektorët erdhën pa paralajmërim, në të kundërtën do ishin sqaruar për situatën” shprehet ai.

Nga Drejtoria për të Ardhura Publike, thonë se fiskalizimi nuk paraqet risi në Maqedoni dhe çdo afarist e di mirë se shitja e prodhimeve me para të gatshme duhet t`i nënshtrohet fiskalizimit, sepse siç thonë, panairi, nuk guxon të jetë burim i ekonomisë gri. /tesheshi.com/

Related posts