Auto Dak
Auto Dak
Auto Dak

DIREKTIVAT/ Lleshaj, gjuhë klerikale e mjekësore për sfidat rrugore: ja mëkatimi në timon, ja virusi në parkim

Në një takim me krerët e Policisë Rrugore, ministri i Rendit Sandër Lleshaj zbërtheu 8 indikatorët bazë në strategjinë europiane për sigurinë e rrugëve, e cila ka kredo “Vizion Zero”, qëllimin pra që deri në 2050 të mbërrihet te zero vdekje nga aksidentet.

E në to, Lleshaj veçoi alkoolin, duke e quajtur, me gjuhë klerikale, si një mëkatim.

“KPI 4, ose indikatori i katërt i performancës sipas BE, është përdorimi i alkoolit, përqindja e shoferëve që përdorin alkool. Mbetet ende i lartë, edhe shifrat tuaja tregojnë që me gjithë masat, me gjithë ndëshkimet, mbetet i lartë ky tregues. Ky tregues duhet ulur dhe duhet ulur në mënyrë të përqendruar duke e orientuar punën tonë aty ku risku është më i lartë.

Kur është risku më i lartë për alkool?! Nuk është në orën 8 të mëngjesit, nuk është as në orën 9, as në orën 12, por janë orët e pasdrekes. Ku janë vendet kryesore ku mblidhen ata që mëkatojnë në fushën e alkoolit? Lokalet e natës, restorantet e të tjera me radhë. Dhe duhet që puna të orientohet këtu”, theksoi Lleshaj.

Ndërkohë, ai paralajmëroi detyrimin e biçikletistëve për të mbajtur dhe ata një skafandër.

“Çështje tjetër e rëndësishme – dhe ky është KPI3 në Strategjinë Europiane – është ai që ka të bëjë me masat mbrojtëse për çiklistët dhe motoçiklistët. Mungesa e mjeteve mbrojtëse për çiklistët dhe motoçiklistët është burim i madh fataliteteve dhe i aksidenteve të tjera. Tani nuk dua t’ju them se si është kjo gjendje në Shqipëri, e dini më mirë se unë, sepse i shihni përditë sesi udhëtohet në Shqipëri, në biçikletë apo në motoçikletë.

Gjendja në këtë fushë është e rëndë. Një pjesë e madhe as nuk e kanë gjëkund të shkruar në koshiencën e tyre që, kur blejnë biçikletën, duhet të blesh edhe pajisjet mbrojtëse, që duhen për të hipur në të. Ata tashmë do të përdorin rrugët e dedikuara dhe jo atje ku është rruga e dedikuar të dalin në krah tjetër. Sepse është ngushtuar hapësira në përdorim të automjeteve tashmë dhe është dhënë hapësirë për çiklistët. Por tashmë çiklistët nuk mund të futen në zonën e ngushtuar të automjeteve, sepse e rëndojnë trafikun dhe rrisin mundësitë e aksidenteve”, theksoi i pari i çështjeve të Rendit në Shqipëri.

Ndër të tjera, ai konsideroi si alarmante mossigurimin e fëimjëve në automjet.

Një tregues tjetër, i dyti në listë, është përdorimi i rripit të sigurimit dhe i sistemeve të sigurimit për fëmijët. Është po ashtu një ndër kontribuesit kryesorë; mosmbajtja e këtyre sistemeve të sigurimit, për të rritur apo fëmijë, është një ndër shkaqet dhe faktorët kryesorë në rritjen e fataliteteve dhe të pasojave. Sa i përket fëmijëve, neglizhencat janë alarmante, shkeljet janë masive, papërgjegjshmëria është e rëndë. Ende nuk kemi arritur të përcjellim këtë mesazh fort te qytetarët e këtij vendi. Jeta e fëmijëve ka vlerë më shumë sesa jeta jonë. Fëmijët duhen ruajtur me përparësi dhe vendosja e sistemeve të sigurisë për fëmijët, në të gjithë llojet e automjeteve, është detyrim ligjor, dhe nuk duhet lejuar kurrsesi abuzimi këtu. Toleranca këtu është me pasoja vrastare”, theksoi ministri Lleshaj.

Në fund, ai konsideroi si virusal parkimin dysh.

 “Parkimet dyshe duhen luftuar si virus, nga Policia e Shtetit dhe nga Policia Bashkiake”, tha Lleshaj. /tesheshi.com/

auto pjese dak

Related posts