728 x 90 Leaderboard

Liverpuli mposht Man. Sitin dhe mbetet ndjekësi më i afërt i Çelsit

Liverpuli u konfirmua si fuqia e dytë në kampionatin anglez me fitoren 1-0 ndaj Mançester Sitit. Me vetëm gjashtë pikë larg Çelsit, Liverpuli është ndjekësi më i afërt i londinezëve. Në të kundërt, Mançester Siti është tani dhjetë pikë larg vendit të parë, e rrezikon të mos jetë në vend të tretë, në varësi të rezultateve të ndeshjeve të nesërme.

Në një ndeshje me ritëm, por të varfër cilësisht, Liverpuli e garantoi fitoren me një gol të minutës së tetë. Lallana krosoi shkëlqyeshëm nga e majta e sulmit të Liverpulit, por akoma më e shkëlqyer ishte goditja me kokë e Wijnaldum-it, me topin që përfundoi në rrjetë.

Ky ishte rasti i vetëm i pjesës së parë, ndërsa 45-minutëshi i dytë nisi me presionin e miqve, që vazhdoi gjer në fund.

Mançester Siti e mbizotëroi tërë pjesën e dytë, por pak u pa ta ngacmonte portën kundërshtare, të mbrojtur nga Mignolet.

Liverpuli u mbrojt mjaft mirë, dhe mund të kishte rrezikuar nëse nuk do të gabonte fort në pasime gjatë kundërsulmeve.

Të hënën, më 2 janar, Liverpuli luan ndaj Sandërlendit në transfertë; Mançester Siti pret Bërnlin. /tesheshi.com/

Related posts